Нам улууһугар Апааныга былырыын күһүҥҥэттэн саҕалаан, биһиги бочуоттаах сынньалаҥҥа олорор ытык кырдьаҕастарбыт араас хайысханан куруһуоктарга көхтөөхтүк уонна тиһиктээхтик дьарыктаннылар.
Бу сыл устата анал кыраапыгынан үлэлээн саҥа талааннар, дьоҕурдар арылыннылар, айарга-тутарга кынаттаннылар уонна эдэр көлүөнэҕэ үтүө холобур буоллулар. Наадалаах уонна интэриэһинэй дьарыктары түмэр куруһуоктар сыллааҕы үлэлэрин үөрүүлээх быһыыга-майгыга түмүктээтилэр.
Бу тэрээһиммит үрдүк таһымнаах быыстапканан уонна кэнсиэринэн арылынна. Тэрээһин бырагырааматыгар иис куруһуогун кыттыылаахтарын үлэлэрэ (иистэнии, баайыы, түүлээхтэн тигии, аттаран тигии, кыбытыктаах аттарыллан тигиллибит сахалыы оһуордаах көбүөрдэр, баататтан куукулалар, оҕүруо оһуордаах суумкалар, норка түүтүттэн тигиллибит оҕуруо киэргэллээх саҕалар, үтүлүктэр уо д а ) көрдөрүүгэ туруорулуннулар. Урукку сылларга сценаттан түспэтэх, сахабыт ырыатын уостан түһэрбэккэ илдьэ сылдьар бэтэрээннэрбит — ырыа куруһуогун кыттыылаахтара тэрээһини кэрэ, нарын куоластарынан сэргэхситтилэр. Биир сүрүн чааһынан остуол оонньууларыгар дьарыктаммыт дьоммут хабылыкка, хаамыскаҕа уонна дуобакка күрэхтэһиилэрэ буолла. Тыҥааһыннаах киирсии түмүгэр икки көрүҥҥэ холбоон, дуобакка «Бастыҥ стратег», хабылыкка «Түргэн тарбах» анал ааттары ылан Еремеев Валерий Федорович «Эн бастыҥҥын» кубогынан наҕараадаланна. Биирдиилээн күрэскэ: дуобакка Эверстов И.И. — 1 м., Еремеев В.Ф. -2, Евсеева Т.И. үһүс миэстэлэри ыллылар. Хабылыкка: Еремеев В.Ф. бастаата, иккискэ — Максимова Л.Д. таҕыста, үсүһү Корякина А.И. ылла. Анал бириистэринэн, мэтээллэринэн наҕараадаланнылар.
Куруһуок салайааччыларыгар Носкова К.П., Эверстова А.В., Аммосова М.А., бэтэрээннэр түмсүүлэрин салайааччыта Лебедева О.И., куруһуоктар үлэлэрин сүрүннээччи Саввина Н.С., Хатыҥ Арыы нэһилиэгин дьаһалтатын исписэлииһэ Сивцева Н. Д. махтал суруктар туттарылыннылар. Бу тэрээһин кырдьаҕастарбыт өссө да эдэрдии эрчимнээхтэрин, айар куттара уостубатын өссө төгүл бигэргэттэ.
Куруһуок кыттыылаахтара сайын устатыгар күүс, сэниэ хомунан, ураты толкуйдары тобулан аны күһүн саҥалыы күүһүнэн эрчимнээхтик үлэлиирдии көрсүөхпүт дэстилэр.
Нина Саввина,
Аппааны, Нам.
Хаартыскалар: Нина Саввина тиксэриилэрэ