Бэс ыйын 4 күнүгэр Дьокуускай куоракка бэс ыйын 1 күнүгэр – Оҕо көмүскэлин күнүгэр Перинатальнай кииҥҥэ күн сирин көрбүт 13 кырачааны (7 кыыс уонна 6 уол) үөрүүлээх быһыыга-майгыга дьиэлэригэр атаарыы буолла, диэн «Саха сирэ» хаһыат суруйар.
Эҕэрдэлээһин сиэрэ-туома Өрөспүүбүлүкэтээҕи килиниичэскэй балыыһа тиэхиньиичэскэй киинин эдэр үлэһитэ Владислав Сивцев ырыанан эҕэрдэтинэн саҕаланна.
Кырачааннары уонна кинилэр ийэлэрин СӨ доруобуйа харыстабылын миниистирин солбуйааччы Татьяна Павлова, СӨ Үлэҕэ уонна социальнай сайдыыга миниистирин солбуйааччы Наталья Черноусова, Дьокуускай куорат дьаһалтатын уопсастыбаннай сибээскэ уонна ыччат бэлиитикэтигэр управлениетын начаалынньыга Петр Попов, “Арассыыйа ийэлэрэ” Бүтүн Арассыыйатааҕы уопсастыбаннай хамсааһын эрэгийиэннээҕи отделениетын чилиэнэ Яна Никитина, “Сахамедстрах” страховка-мэдиссиинэ хампаанньатын генеральнай дириэктэрин солбуйааччы Василий Ядреев, “Капитал. Мэдиссиинэ страховката” отделын начаалынньыгын солбуйааччы Алена Иванова уонна өрөспүүбүлүкэтээҕи килиниичэскэй балыыһа кылаабынай бырааһын э.т. Катерина Григорьева эҕэрдэлээтилэр. Ону сэргэ кырачааннар аҕалара, төрөппүттэр, аймахтар кэлбиттэр.
СӨ доруобуйа харыстабылын миниистирин солбуйааччы Татьяна Павлова:
“Бэс ыйын 1 күнэ эһиэхэ мэлдьи икки төгүл үөрүүлээх бырааһынньык буолуоҕа. Ол эбэтэр бэйэҕит төрөөбүт күҥҥүтүн уонна Оҕо көмүскэлин күнүн бэлиэтиэххит. Өрөспүүбүлүкэбитигэр оҕо төрөөһүнүн өйүүргэ олус элбэх үлэ ыытыллар. “Дьиэ кэргэн” федеральнай национальнай бырайыак чэрчитинэн 2025 сылга икки Перинатальнай кииммит аныгы күүстээх тэриллэринэн сэбилэммитэ. Доруобуйа харыстабылын министиэристибэтэ ураты болҕомтону ийэ уонна оҕо көмүскэлигэр уурар. Перинатальнай көмө сайдар, мэдиссиинэ көмөтө хаачыстыбалаах уонна табыгастаах буолан иһэр. Перинатальнай киин үлэһиттэрэ ийэ уонна оҕо доруобуйатыгар кыһамньыларын сэргэ, төрөппүттэргэ табыгастаах буоларыгар араас өҥөнү оҥороллор. Холобур, күн сиригэр кэлбит кырачаан киһи олоҕор бастакы докумуонун тута уонна миэстэтигэр оҥорторорун туһугар бэс ыйын 1 күнүгэр манна ЗАГС исписэлииһэ үлэлиир миэстэтин арыйбыппыт. Бырааһынньыга, өрөбүлэ суох бэйэлэрин харыстаммакка үлэлиир Перинатальнай киин үлэһиттэригэр махтанан туран, бу үөрүүлээх күҥҥэ төрөөбүт оҕолорго уонна ийэлэргэ өссө төгүл эҕэрдэбин тириэрдэбин”, — диэн, саҥа төрөөбүт ийэлэргэ Доруобуйа харыстабылын министиэристибэтин бэлэхтэрин туттарда.
Бу күн өссө биир долгутуулаах түгэнинэн СӨ үлэҕэ уонна социальнай сайдыыга миниистирин солбуйааччы Наталья Черноусова “Үйэ оҕолоро” уонна дьиэ кэргэн эрэгийиэннээҕи хапытаалларын сэртипикээтин ийэлэргэ туттарыыта буолла.
Бүгүҥҥү үөрүүлээх бырааһынньык саҥа төрөөбүт кырачааннарга таптал, кыһамньы биһиги олохпутугар туохтааҕар да улахан суолталааҕын өссө төгүл санатта. Эҕэрдэлээбит дьон бары эдэр ийэлэр уонна аҕалар алаһа дьиэлэригэр мэлдьи оҕо дьоллоох саҥата чаҕаарарыгар, хас биирдии күн үөрүүнү-көтүүнү эрэ аҕаларыгар уонна оҕо саас түргэнник ааһарынан, дьоллоох түгэннэри харыстыылларыгар баҕардылар.
Бүгүҥҥү күнтэн мин олус долгуйдум. Өрөспүүбүлүкэтээҕи килиниичэскэй балыыһа, Перинатальнай киин кэлэктиибигэр уҕараабат кыһамньыларын, идэлэригэр бэриниилэрин, көмүс илиилэрин, тулуурдарын иһин олус махтанабын. Күнүстэри-түүннэри үлэлиир акушеркалар, гинекологтар биһиэхэ көмөлөһөр баҕаларын, дьулуурдарын иһин ураты махталбын этэбин.
Бэс ыйын 1 күнүгэр талыым киирбитигэр ханна тиийиэхтээхпин бастаан билбэтэҕим. “Суһал көмөҕө” эрийбитим уонна түүн дьиэбиттэн чугас Перинатальнай кииҥҥэ кэлбиппит. Биһигини наһаа үчүгэйдик көрсөн, көмөнү тута оҥорбуттара. Үлэһиттэр мэлдьи бэлэм турукка сылдьаллар эбит. Онон оҕобун этэҥҥэ төрөппүттэригэр наһаа махтанабын.
Перинатальнай кииҥҥэ барыта аныгылыы, көрүдүөрдэрэ киэҥнэр. Саҥа кэлбит киһи да улаханнык мунаахсыйбат, ханна тиийэргин, кимиэхэ киирэргин ыйар, сирдиир суруктар бааллар. Анаалыстары тута ылаат, ханнык отделениеҕа бараргын быһаара охсоллор. Барыта ып-ыраас, үлэһиттэр олус болҕомтолоохтор, үтүө санаалаахтар, барытын быһааран биэрэллэр.
Бүгүн ийэҕэ уонна оҕоҕо бэриллэр хапытааллар сэртипикээттэрин үөрүүлээх быһыыга-майгыга туттардылар. Сэртипикээттэр суумаларыттан олус соһуйдум! Өрөспүүбүлүкэ хапытаалын үһүс оҕоҕо биэрбэттэрэ буолуо дии санаабытым, онон бүгүн соһуччу тутан долгуйдум уонна үөрдүм.
Туйаара Данилова:
— Перинатальнай кииҥҥэ бастакы оҕобун төрөппүтүм. Иккис оҕобор эмиэ бу Кииҥҥэ кэлэн, этэҥҥэ оҕолоннум. Оруобуна Оҕо көмүскэлин күнүгэр төрүөм диэн санаабат да этим. Ол эрээри, эмискэ талыым киирэн, эмиэ манна кэлбитим уонна бу бырааһынньык күн кырачааммар күн сирин бэлэхтээбит дьоллоох төрөппүттэр буоллубут.
Ыспыраапка:
Дьокуускай куоракка Перинатальнай киин “Доруобуйа харыстабыла” национальнай бырайыак чэрчитинэн тутуллубута. Оттон мэдиссиинэ тэриллэринэн “Уһун уонна көхтөөх олох” уонна “Дьиэ кэргэн” национальнай бырайыактарынан салгыы хааччыллар. 2018 сыллаахха арыллыбыт Киин Өрөспүүбүлүкэтээҕи килиниичэскэй балыыһа иһинэн үлэлиир. Манна акушерство-гинекология, неонатология, педиатрия уонна анестезиология-реанимация, амбулатория-поликлиника өҥөлөрүн оҥороллор.
Перинатальнай кииҥҥэ 140-тан тахса быраас, 300 орто сүһүөх үлэһит, 120 алын сүһүөх үлэһит баар. Кииҥҥэ сыл аайы 5,5 тыһыынчаттан тахса оҕо төрүүр. Өрөспүүбүлүкэ бары улуустарыттан кэлбит оҕо күүтэр дьахталларга мониторинг оҥоһуллар. Уһук Илиҥҥэ соҕотох катамнез отделениетыгр кыра ыйааһыннаах төрөөбүт оҕолору 4 саастарыгар диэри кэтээн көрөллөр уонна туруктарын чөлүгэр түһэрэллэр.
Дьахталлар консультацияларыгар оҕо күүтэр ийэлэр, ордук Арктика уонна Хотугу улуустартан кэлээччилэр, олус наадыйаллар.
Сообщение Оҕо көмүскэлин күнүгэр төрөөбүт кырачааннары үөрүүлээх быһыыга-майгыга атаардылар появились сначала на Улус Медиа.