Экология, айылҕаны туһаныы уонна ойуур хаһаайыстыбатын итиэннэ “Авиалесоохрана” тэрилтэ пресс-сулууспалара иһитиннэрэллэринэн, бэс ыйын 29 күнүгэр 14 улуус сиригэр ойуур уотун эргийии уонна умуруоруу үлэлэрэ салҕанан бараллар.
Абый, Эдьигээн, Орто Халыма, Кэбээйи, Таатта, Муома, Ленскэй, Өлөөн, Нерюнгри, Чурапчы, Уус Маайа, Уус Алдан, Мэҥэ Хаҥалас, Эбээн Бытантай улуустарыгар баһаары утары ураты эрэсиим олохтонон турар. Ити иһигэр Нерюнгрига уонна Ленскэйгэ муниципальнай суолталаах ыксаллаах быһыы-майгы эрэсиимэ биллэриллибитэ.
Бүгүҥҥүттэн, бэс ыйын 29 күнүттэн, “Дьокуускай куорат” куораттааҕы уокурук сиригэр-уотугар баһаары утары ураты эрэсиим үлэлиэҕэ. Ол туһунан дьаһалга киин куорат баһылыгын эбээһинэһин толорооччу В.Е. Дорожкин илии баттаата. Онон эрэсиим үлэлиир кэмигэр дьон ойуурга тахсара хааччахтанна. Хааччахтааһын олохтоммут күннэригэр туһааннаах сулууспалар өйдөтөр-сэрэтэр үлэни күүһүрдүөхтэрэ, эриэйдэлэри тэрийиэхтэрэ. Олохтоох управалар туох дьаһаллары ыыппыттарын нэдиэлэ ахсын отчуоттуур буолуохтара.
Бэҕэһээ, бэс ыйын 28 күнүгэр, киэһэ 10 чаастааҕы дааннайынан, Саха сиригэр 4 уот көрдүгэнин саба туттулар. Ол иһигэр Нерюнгри оройуонугар 8-с №-дээх, 3 215 гектардаах күөх суугуну сиэбит саамай улахан уоту Авиалесоохрана 66 үлэһитэ 6 анал тиэхиньикэ көмөтүнэн умуруордулар. Бу оройуоҥҥа өссө 1,5 гектарга тарҕаммыт уот бохсулунна. Хаҥалас улууһугар 5 гектар, Дьокуускай куоракка 1,5 гектар иэннээх тыаны салаан, саҥардыы тэнийэн эрэ көрдүгэннэри саба туттулар. Ити баһаардары умуруорууга Авиалесоохрана 109 исписэлииһэ, Якутлесресурс 17 үлэһитэ кытыннылар, 15 анал тиэхиньикэ туттулунна.
Балары таһынан Ленскэйгэ 135 уонна 338 гектардаах улахан уоттары төгүрүйэн, умуруора сылдьаллар.
Василий Никифоров
Хаартыска: Улус.Медиа
Также по теме:
Новую систему NATISK используют в тушении лесного пожара в Якутии
Сообщение Дьокуускай куоракка бүгүҥҥүттэн ойуур уотун утары ураты эрэсиим олохтонно появились сначала на Улус Медиа.