Бэҕэһээ, от ыйын 1 күнүгэр – Саха төрүт бэчээтин күнүгэр, Саха Өрөспүүбүлүкэтин Национальнай уус-уран ойуулуур-дьүһүннүүр музейыгар «Чолбон» уус-уран литература уонна общество-политика сурунаала төрүттэммитэ 100 сылыгар анаан «Colbon oju:ta» быыстапка арылынна.
Литература санаатын худуоһунньуктар Эллэй Сивцев, Валериан Васильев, Михаил Старостин, Ефим Шапошников, Сэксэй Парников, Дьулустаан Бойтунов, Николай Курилов, Юрий Вотяков холустаҕа түһэрбиттэрэ көрөөччү дьүүлүгэр турда. Экспозиция үс сүрүн хайысхалаах: киһи, кинигэ графиката уонна олоҥхо. Манна ыалдьыттар «Маарыкчаан ыччаттара», «Сааскы кэм», «Тыгын Дархан», «Чыҥыс хаан ыйааҕынан» курдук бөдөҥ айымньыларга анаммыт үлэлэри сэҥээрэ көрүөхтэрэ. Музей үлэһиттэрэ бэлиэтииллэринэн, бу үлэлэр, саха литературатын бэлиэ айымньыларын аргыстара буолан, дириҥ ис хоһоонноох кэпсэтиигэ ыҥыраллар.
Александр Жирков, СӨ Ил Түмэнин Бэрэссэдээтэлин бастакы солбуйааччы:
– «Чолбон» сурунаал билиҥҥи коллектива сурунаалы олохтообут дьон ыра санааларын олоххо киллэрэргэ үлэлиэхтээххит, саха тылын харыстыыр үлэни салгыахтааххыт.
Афанасий Ноев, СӨ культуратын уонна духуобунай сайдыытын миниистирэ:
– Бу сыллар тухары «Чолбон» сурунаал киэҥ далааһыннаах, айымньылаах көрүүтүн ыһыктыбакка кэллэ. Суруйааччылар да, ааҕааччылар да ону сыаналыыллар. Бүгүн литература уонна искусство быстыспат ситимнээхтэрин туоһулаан музейы кытары бииргэ үлэлээн маннык быыстапка арыллыбытыттан улуу убайдарбыт үөрүөхтэр этэ дии саныыбын. СӨ культуратын уонна дуухобунай сайдыытын министиэристибэтэ сурунаалы өйүүбүт уонна бииргэ үлэлэһэргэ бэлэммит.
Влада Тимофеева, СӨ Национальнай уус-уран ойуулуур-дьүһүннүүр музейын генеральнай дириэктэрэ:
– «Чолбон» сурунаалы кытары уонунан сыллардаах доҕордоһуубут биир үтүө түмүгэ бу быыстапка. Биһиги саха литературатын айымньыларын иллюстрациялары көрдөрүүгэ сэдэхтик туруорабыт. Онон бу быыстапка ол үлэлэри көрөргө кыах биэрэр.
Гаврил Андросов, «Чолбон» сурунаал бас эрэдээктэрэ:
– «Чолбон» сурунаал төрүттэниэҕиттэн саха культуратын, искусствотын биһигэ буолбута. Саха литературатын классиктарын айымньыларын сэргэ ойуулуур-дьүһуннүүр искусствоҕа, музыкаҕа, театрга сыһыаннаах ыстатыйалар, үлэлэр бэчээттэнэллэрэ. Худуоһунньук Михаил Носов сурунаал таһын сахалыы тыыннаан ойуулаабыта. Онон сурунаал төрүттэммитэ 100 сылынан маннык быыстапка оҥоһуллара олус бэлиэ. Билиҥҥи «Чолбон» уонна СӨ уус-уран ойуулуур-дьүһүннүүр музейа кэлиҥҥи сылларга утумнаахтык бииргэ үлэлэһэр, саха худуоһунньуктарын, скульптордарын үлэлэрин көрдөрөр рубрикалар, худуоһунньукутар тустарынан уочаркалар, интервьюлар, ыстатыйалар тиһигин быспакка тахсаллар. Биһиги эрэдээксийэбитигэр үлэлээбит суруйааччы Лев Габышев сиэнэ, музей салайааччыта Влада Владиславовна Тимофеева сурунаал суолтатын өйдөөн маннык быыстапканы тэрийбитигэр эрэдээксийэ уонна ааҕааччылар ааттарыттан махтанабын.
Үөрүүлээх тэрээһиҥҥэ вице-спикер Александр Жирков махтал суруктарын «Чолбон» сурунаал техническэй эрэдээктэригэр Зинаида Протопоповаҕа, редколлегия чилиэнигэр Варвара Белолюбскаяҕа-Аркукка туттарда. СӨ культуратын миниистирэ Афанасий Ноев сурунаал бас эрэдээктэригэр Гаврил Андросовка «СӨ төрүт тылларын харыстааһыҥҥа уонна сайыннарыыга кылаатын иһин» бочуоттаах бэлиэни туттарда.
Быыстапка атырдьах ыйын 2 күнүгэр диэри үлэлиэҕэ.
Анна Прудецкая
Владимир Григорьев хаартыскаҕа түһэриилэрэ
Өссө ааҕыҥ:
«Чолбон» айар кыһатын бастыҥнарын бэлиэтээтилэр
Сообщение «Чолбон ойуута» быыстапка арылынна появились сначала на Улус Медиа.