Антонина Егоровна уонна Павел Самсонович ыал буолан, оҕо-уруу төрөтөн, бу орто дойдуга дьоллоохтук ньир-бааччы олорбуттара от ыйын 2 күнүгэр 50 сыллара буолла.
Үйэ аҥарын устата тапталларын кутаата күлүбүрэччи умайара уостубакка, сахалыы сиэринэн сэмэйдик уонна дьоһуннук олорон, Тиит Эбэ нэһилиэгин биир ытык-мааны ыала буолаллар.
Павел Самсонович Алданнааҕы техникумҥа үөрэнэн, электрик, суоппар идэтин баһылаан, сопхуоска суоппарынан үлэлээн, бочуоттаах сынньалаҥҥа тахсыбыта. Өр сыллаах үтүө суобастаах үлэтин Бочуотунай кыраамата, махтал суруктар туоһулууллар.
Антонина Егоровна дьааһыла-саадыгар сиэстэрэ-иитээччинэн, поварынан үлэлээн, доруобуйатынан инбэлииккэ тахсан, бочуоттаах сынньалаҥҥа олорон кэллэ.
Антонина Егоровна, Павел Самсонович кыыс оҕону төрөтөн, ыал оҥорон, сиэни төлкөлөөн, чөл олоҕу тутуһан, эдэр ыалга холобур буолар дьоһун-мааны ыал.
Бу күн ис дууһаттан эҕэрдэ бастыҥын анаатылар олохтоох дьаһалта баһылыгын солбуйааччыта Лилия Самсонова, «Кэскил» оҕо саадын сэбиэдиссэйэ Юлиана Трофимова, нэһилиэк бэтэрээннэрин Сэбиэтин салайааччыта Алевтина Скрябина, Ой-Кэккэ түөлбэттэн Мария Михайлова. Ытыктыыр күндү дьоммутун олохтоох дьаһалта специалиһа Лена Ефремова Хаҥалас улууһун Ытык кинигэтигэр киллэрдэ, «Килбиэннээх дьиэ кэргэн» диэн өйдөбүнньүк бэлиэ туттарда.
Үлэнэн киэркэйбит олоххутунан, ийэ-аҕа, эбэ-эһэ быһыытынан бар дьоҥҥутугар холобур буолаҕыт. Сарын сарыҥҥытыттан өйөнсөн, ыарыыга бэриммэккэ өссө уһуннук олоруҥ, диэн истиҥ тылларбытын аныыбыт!
Анастасия Мордовская, Тиит Эбэ
Сообщение 50 сыл бииргэ: Тиит Эбэ ытык мааны ыала появились сначала на Улус Медиа.