Ис дьыала министиэристибэтин «Дьокуускайдааҕы» МУ полиция 4 №-дээх отделыгар телекоммуникационнай хампаанньа бэрэстэбиитэлэ сокуону утары быһыы-майгы тахсыбытын туһунан сайабылыанньа киллэрбит.
Губинскай уокурукка турар дьиэ үрдүттэн биллибэт киһи сибээс уонна интэриниэт 45 миэтэрэ уһуннаах кабелын уоран ылбыт. Тэрилтэ биэрбит чахчыларынан, материальнай хоромньу суумата 15 000 солкуобайга тэҥнэспит.
Суһал-ирдиир үлэлэр түмүктэринэн, полиция үлэһиттэрэ уорбаланааччыны быһаарбыттар. Ол курдук урут уорууга сууттаммыт, 41 саастаах Дьокуускай куорат олохтооҕо эбит.
Быһаарыллыбытынан, бу кэмҥэ харчыга наадыйа сылдьыбыт уорбаланааччы, бэйэтэ олорор элбэх кыбартыыралаах дьиэтин үрдүгэр алтан кабеллар баалларын өйдөөн кэлбит. Эр киһи онно тахсан, быһаҕынан 35 миэтэрэ кэриҥэ кабелы быһан ылбыт уонна уоран баран батарбыт. Аҕыйах хонугунан уорбаланааччы иккиһин кэлэн, өссө 10 миэтэрэ алтан кабелы быспыт. Уоруллубут малтан киирбит үбү-харчыны барытын, былааннаабытыныы, арыгы уонна ас атыылаһарга туттубут.
РФ Холуобунай кодексын 158 ыстатыйатын 1 чааһынан эр киһиэхэ холуобунай дьыала көбүтүллүбүт.