ИДьМ Дьокуускайдааҕы салаатын полиция 1 №-дээх отделын дьуһуурунай чааһыгар олохтоох киһиттэн түөкүннээһиҥҥэ сайабылыанньа киирбит.
Сайабылыанньалаах быһаарбытынан, оонньуур приставканы билбэт киһитигэр уларсыбыт, ол эрээри туһааннаах киһи аренда болдьоҕо бүппүтүн кэнниттэн нэдиэлэ устата төнүннэрбэтэх. Араас сылтах булан, уларсыбыт тиэхиньикэтин биэрбэккэ эрэйдээбит. Онон, эмсэҕэлээччи малын төнүннэриэ суоҕун өйдөөн, полицияҕа сайабылыанньа суруйбут.
Суһал-ирдиир үлэ кэмигэр холуобунай ирдэбил үлэһиттэрэ уорбаланааччыны быһаарбыттар. Кини 39 саастаах эр киһи эбит.
Быһаарыллыбытынан, уорбаланааччы интэриниэккэ икки геймпадтаах уонна үс оонньуур диискэлээх «Sony PlayStation 5» оонньуур приставка арендаҕа бэриллэрин туһунан биллэриини көрбүт. Тиэхиньикэни биир сууккаҕа уларсан баран, бас билээччитигэр төнүннэрэр санаата суох эбит. Ол күн кини приставканы ломбардка 23 тыһыынча солкуобайга туттарбыт, ол харчытынан арыгы атыыласпыт.
Эр киһиэхэ РФ Холуобунай кодексатын 159-с ыстатыйатын 1-кы чааһынан «Түөкүннээһин» диэн холуобунай дьыала көбүтүллүбүт.