Нерюнгри улууһун Иенгра сэлиэнньэтигэр уонна Хани бөһүөлэгэр хочуолунайдар үлэлэрин саҕалаатылар. Бары штатнай эрэсииминэн үлэлииллэр, исписэлиистэр дьиэ иһинээҕи ититии систиэмэлэрин бэрээдэктииллэр. Бу туһунан улуус дьаһалтата иһитиннэрдэ.
Күн-дьыл усулуобуйатын учуоттаан, улуус дьаһалтата нэһилиэктэр баһылыктарын, борокуратуураны уонна Саха Өрөспүүбүлүкэтин бырабыыталыстыбатын кытта олох-дьаһах эбийиэктэрин эниэргийэнэн хааччыйыыны тэрийэр миэрэлэри ылла. Бу Иенграҕа уонна Ханига хочуолунайдары үлэлэтэргэ кыаҕы биэрдэ.
Балаҕан ыйын 10 күнүттэн Нерюнгри улууһугар үрдүк бэлэмнээх буолуу эрэсиимэ үлэлиир. Улуус дьаһалата оттук сезонун туруктаахтык ааһары хааччыйыыга үлэтин салгыыр.
Ил Дархан, бырабыыталыстыба дьаһалтатын пресс-сулууспата.