Ленскэй оройуонугар 2027 сыл от ыйын 3-4 күннэригэр ыытыллыахтаах Олоҥхо ыһыаҕар бэлэмнэнэллэр.
Өрөспүүбүлүкэ араас муннугуттан 15 тыһыынчаҕа тиийэ ыалдьыты түмэр улахан тэрээһиҥҥэ бэлэмнэнии чэрчитинэн, сири-уоту тупсарыыга уонна инфраструктураны сайыннарыыга кэлим үлэ ыытыллыаҕа.
Ил Дархан Айсен Николаев Ленскэйгэ үлэтинэн сылдьан, тэрийэр кэмитиэт мунньаҕын ыытта. Онно Олоҥхо ыһыаҕа норуоттар сомоҕолоһууларын бөҕөргөтүүгэ уонна территориялары кэлимник сайыннарыыга стратегическай соруктары быһаарарын тоһоҕолоон бэлиэтээтэ.
—19 сыл устатыгар Олоҥхо ыһыаҕа Саха сирин араас оройуоннарыгар ыытыллан, бүтүн өрөспүүбүлүкэни түмэр тэрээһининэн буолла. Сүрүн ис хоһооно — төрөөбүт тылы, үгэстэри харыстааһын, Саха сирин норуоттарын сомоҕолоһууларын бөҕөргөтүү, историяҕа, култуураҕа ытыктабыллаах сыһыаны иитии. Итини сэргэ Олоҥхо ыһыаҕа территория сайдыытыгар тирэх буолар, суоллар, уопсастыбаннай сирдэр, сынньанар сирдэр оҥоһуллаллар, тупсарыллаллар, туризмҥа саҥа кыахтар үөскүүллэр. Ленскэй оройуонун олохтоохторо бүтүн өрөспүүбүлүкэни кытта Олоҥхо ыһыаҕын бэлэмнэниитигэр көхтөөхтүк кыттыахтара диэн эрэнэбин. Дьону түмэр, өр сылларга үтүө өйү-санааны хаалларар дьиҥнээх уопсай тэрээһин буоллун, — диэн Айсен Николаев тоһоҕолоон бэлиэтээтэ.
Далааһыннаах тэрээһин сүрүн былаһааккатынан Ленскэй куорат арҕаа өттүгэр Өлүөнэ кытылыгар турар кэрэ көстүүлээх сир буолуоҕа. 79 тыһ. кв.м. кэриҥэ иэннээх сиргэ 15 эбийиэк тутуллуоҕа. Ол иһигэр Аал Луук маһы, Аар баҕаҕы, сэргэни, олоҥхоһуттар ураһаларын, уустар түһүлгэлэрин, ыалдьыттар ураһаларын уонна киирии аарканы киллэрэн туран. Бу тутуулар бары оройуон култууратын уонна туризмын сайыннарыыга сүҥкэн кылаатынан буолуохтара. Билигин былаһааккаҕа номнуо топографическай устуу, инженернэй чинчийии уонна бырайыактыыр-сметнай докумуоннары бэлэмнээһин бара турар.
Ленскэй улууһун баһылыга Александр Черепанов этэринэн, сир дизайн-кода уонна бырааһынньык логотиба оҥоһуллубут. Билигин сөбүлэһиигэ сылдьаллар. Ону тэҥэ Ленскэй ураты сирдэринэн туристическай маршрут бырайыага оҥоһуллубут. РНГ хампаанньаны кытта бииргэ үлэлээһин туһунан сөбүлэһии түһэрсиллибит, ол чэрчитинэн Мииринэй уонна Ленскэй оройуоннар кыраныыссаларыгар стела оҥоһуллара былааннанар.
Тутуу үлэтин сэргэ 60 кэриҥэ култуура бырагыраамата оҥоһуллар.
Улахан суолталаах түһүмэҕинэн 2027 сылга кулун тутар 11-12 күннэригэр былааннаммыт научнай-методическай кэмпириэнсийэ буолуоҕа. Научнай-чинчийэр институттар, култуура тэрилтэлэрэ уонна Олонхо дьиэлэрэ Ленскэй куоракка да, оройуон нэһилиэнньэлээх пууннарыгар да кэккэ эспэдииссийэлэри, быыстапкалары уонна үөрэх бырайыактарын ыытыахтара, уопсастыбаннаһы кытыннарыахтара.
Кэнники икки сылга Ленскэй оройуонун дэлэгээссийэлэрэ атын улуустарга тэрээһиннэри ыытыыны күүскэ үөрэттилэр, өрөспүүбүлүкэ таһымнаах научнай-методическай кэмпириэнсийэлэргэ кытыннылар. Күрэхтэһии балаһыанньатын оҥорууга өрөспүүбүлүкэтээҕи национальнай усупорт көрүҥнэрин киинин кытта көхтөөх үлэ барар, судьуйалар састааптара тэриллэр.
Олоҥхо ыһыаҕар бэлэмнэнии СӨ Ил Дарханын 2024 сыллааҕы дьаһалыгар сөп түбэһиннэрэн ыытыллар. 2026 сыллаахха Олоҥхо ыһыаҕа Кэбээйи улууһугар ыытыллыбыта, түһүлгэҕэ далааһыннаах тэрээһин түмүгэр, Ытык Дуоҕа Ленскэй оройуонун дэлэгээссийэтигэр үөрүүлээх быһыыга-майгыга туттарыллыбыта. СӨ Ил Дарханын уона Бырабыыталыстыбатын пресс-сулууспата
Сиһилии: https://www.sakha.gov.ru/news/63160
Андрей Сорокин хаартыскаҕа түһэриитэ