Бүгүн Дьокуускайга быыбар үс күнүн устата куоластааһын хаамыытын хонтуруоллуур Уопсастыбаннай кэтээн көрүү киинэ аһылынна.
Киин өрөспүүбүлүкэҕэ быыбар хайдах баран иһэрин көрөр тутаах былаһааккана буолуоҕа. Онно 277 учаастактааҕы быыбардыыр хамыыһыйа холбонон, трансляция дьиҥнээх кэмҥэ ыытыллыа. Ону таһынан өссө 515 учаастакка куоластааһын хаамыытын барытын устар видеорегистратордар туруорулуннулар. Бу үс күн устата бэлитиичэскэй баартыйалар, уопсастыбаннай бэрэстэбиитэллэрэ, суруналыыстар уонна биирдиилээн даҕаны дьон кииҥҥэ тиийэн ханнык учаастакка быыбар хайдах баран иһэрин кэтээн көрүөхтэрин сөп. Ол курдук бу 277 учаастакка түүннэри-күнүстэри камералар үлэлиэхтэрэ. Киин биир кэмҥэ 100-ҕэ тиийэ кэтээн көрөөччүнү хабыан сөп диэн тэрээһиҥҥэ эттилэр.
Киин аһыллыытыгар былаас, быыбар тиһигин уонна уопсастыбаннас бэрэстэбиитэллэрэ тыл эттилэр, бииргэ үлэлээһин суолтатын тоһоҕолоон бэлиэтээтилэр.
Станислав Иванов, СӨ Уопсастыбаннай балаататын бэрэссэдээтэлэ, уустук географическай усулуобуйаҕа үлэлииргэ бэлэмнээҕин бэлиэтээтэ: «Саха сирэ үс часовой пояска тайаан сытар дойду соҕотох эрэгийиэнинэн буолар. Онон Уопсастыбаннай кэтээн көрүү киинэ, куорат өссө утуйа сыттаҕына, үлэтин саҕалыаҕа. Биһиги өрөспүүбүлүкэбит саамай уһук оройуоннарыгар ол кэмҥэ быыбар хайыы-үйэ саҕаланыаҕа, куоластааһыҥҥа киириэхтэрэ. Итиэннэ Уопсастыбаннай кэтээн көрүү киинэ үс күн устата сарсыарда 5:30 чаастан киэһэ 20:00 чааска диэри үлэлиэҕэ. Быыбардыыр хамыыһыйалар быыбарга бэлэмнэрин кэтээн көрүөхпүт. Саамай сүрүнэ –быыбар сокуонун ирдэбилигэр сөп түбэһиннэрэн, куоластааһын аһаҕастык, дьэҥкэтик барыахтаах».
«Бүгүн Уопсастыбаннай кэтээн көрүү киинин астыбыт, бу үлэ былаһаакката буолар. Биһиги чиэһинэйдик дуу, аһаҕастык дуу куоластыырбытын, быыбар учаастагар туох буоларын чахчы хонтуруоллуур киин буолуо. Туох эмэ кэһиилэр буолар түгэннэрин уопсастыбаннай кэтээн көрөөччүлэр квалификациялаах сыанабылы биэриэхтэрэ, бэлиэтиэхтэрэ», — диэн СӨ Киин быыбардыыр хамыыһыйа бэрэссэдээтэлин солбуйааччы Иван Андросов санаатын үллэһиннэ.
Онтон Уопсастыбаннай кэтээн көрүү киинин салайааччыта Владислав Окороков күүһү сомоҕолооһуҥҥа болҕомтотун уурда: «Быыбардыыр хампаанньаларга кыттар бары интэриэстээх өрүттэр күүстэрин сомоҕолуур туһугар Уопсастыбаннай кэтээн көрүү киинин тэрийдибит. Манна ким баҕарар, быыбары интэриэһиргиир киһи кэлэн көрүөн, киин чилиэннэрин кытары кэлэн кэпсэтиэн, бэйэтин ыйытыыларын биэриэн сөп».
Саха сиригэр киһи быраабын боломуочунайа Сардаана Гурьева быыбардааччылар бырааптарын бастатан туран көмүскүүр туһунан эттэ: «Быыбардааччылар бырааптарын көмүскээһин эмиэ биир суолталаах хайысха буолар. Киин үлэтэ бу үс күн устата олус суолталаах буолуо. Быыбар хайдах барарын, аһаҕаһын, чиэһинэйдик ыытылларын, дьэҥкирин кэтээн көрүөхтэрэ. Кэһиилэр тахсар түгэннэригэр биһиги бэрэбиэркэ ыытыахпыт уонна сөптөөх миэрэни ылыахпыт».
«Ростелеком» ААУо филиалын дириэктэрэ Роман Фелиферов бырайыагы технологическай өйөөһүн туһунан кэпсээтэ: «Быыбар учаастактарыгар 620-чэ видеокамераны туруордубут, онно таһыытыгар-туруоруутугар хампаанньа бары кэриэтэ үлэһиттэрэ кыттыннылар. Биһиэхэ улахан эппиэтинэс сүктэриллибитин өйдүүбүт, туруктаах үлэни уонна сибээһи тэрийэбит».
Маннык киини тэрийии дьон быыбардыыр систиэмэҕэ итэҕэллэрин бөҕөргөтүүгэ улахан суолталаах хардыынан буолар. Мунньах кыттыылаахтара бэлиэтээбиттэринэн, быыбар аҥардас бэлитиичэскэй процедура эрэ буолбакка, бу уопсай дьыала, гражданскай эппиэтинэс бырааһынньыга.
