Еврейскэй автономнай уобаласка киэҥ далааһыннаах Креативнай индустрия уонна ыалдьытымсах быһыы норуоттар икки ардыларынааҕы пуорумун түмүгүн таһаардылар. Эрэгийиэн түөрт күн устата Арассыыйа уон субъегын уонна Кытай эспиэртэрэ түмсэр сиригэр кубулуйда. Пуорумҥа суолталаах эйгэлэри хабар 30-тан тахса тэрээһин буолла: туризмтан, дизайнтан саҕалаан программированиеҕа, оҥоһуу өйгө тиийэ.
“Еврейскэй автономнай уобаласка бу курдук былаһааккалар улахан суолталаахтар: мантан кэлин эрэгийиэн экэниэмикэтэ, дьон дьарыктаах буоларыгар идиэйэлэр тахсаллар, бииргэ үлэлэһэр тэрилтэлэр, быһаарыылар көстөллөр. Ону кытта сэргэ Бэрэсидьиэн Владимир Владимирович Путин экэниэмикэҕэ креативнай индустрия өлүүтүн үрдэтэр туһунан туруорбут соругун быһаарабыт” – диэн ЕАУо губернатора Мария Костюк бэлиэтээтэ.
Дьыалабыай бырагыраамаҕа барыта 40-тан тахса эспиэр кытынна. Кыттааччылар интеллектуальнай бас билиини көмүскээһин, каадыры бэлэмнээһин, маркетинг уонна биисинэскэ сыыппараны киллэриини кэпсэттилэр.
Уобалас кыаҕын дизайнер Артемий Лебедев үрдүктүк сыаналаата: “Эрэгийиэн бигэ тирэхтээх. ЕАУо сүҥкэн уратыта – уобалас каартаҕа биллэр туочукатынан эрэ буолбакка, дойдуттан айанньыттар кэлэллэригэр ирдэнэр хайысханан буоларын сайыннарар бааза”.
Креативнай индустрияны сайыннарыы – Арассыыйа национальнай соруктарыттан биирдэстэрэ. Дойду баһылыга Владимир Путин сорудаҕынан, 2030 сылга дойду валовай бородууксуйатын өлүүтэ 6% тиийиэхтээх. Еврейскэй автономнай уобалас бу сыалга эрэллээхтик хардыылыыр: кэлиҥҥи биэс сылга эрэгийиэн аччыгый уонна орто урбааҥҥа креативнай биисинэскэ өлүүтэ 3,3%-тан 4,4% диэри үрдээбит.