Өлүөхүмэ улууһугар былыр-былыргыттан элбэх омук тоҕуоруһан олорор сирэ. Улуус баһылыга Николай Харбин кэргэнинээн сахалыы таҥастаах кэлэн куоластаатылар.
“Биһиги «Быыбарга национальнай таҥастаах » диэн флешмобу өйөөтүбүт, — диир Николай Николаевич. – 2026 сыл – Арассыыйаҕа Норуоттар сомоҕолоһууларын сыла, СӨ Култуура сыла, Өлүөхүмэ улууһугар Норуот үгэстэрин сыла. Бу флешмоб төрүттэрбитигэр, историябытыгар, култуурабытыгар уонна дойдубут норуоттарын үгэстэригэр ытыктабылы үөскэтэринэн биһигини түмэр сыаннастары кытта олус сөп түбэһэр.
Биһиги улууспутугар араас омук бэрэстэбиитэллэрэ бэйэлэрин үгэстэрин, тылларын, култуураларын харыстаан, бэйэ-бэйэлэрин сиэрдэрин-туомнарын ытыктаан олороллор. Биһиги күүспүт бу маннык сомоҕолоһууга уонна уратылаһыыга сытар.
Өлүөхүмэ улууһун олохтоохторун гражданскай иэспитин толорон, быыбардыыр учаастактарга кэлэн, куоластааһыҥҥа кыттаргытыгар ыҥырабын”.