2026 сыл атырдьах ыйын 21 күнүгэр Дьокуускайга “Туймаада” эргиэн киинигэр “Ваш Лаваш” (“Донер14”) ааптарскай стрит-фуд туочука шаурматын сиэн баран, истэрэ ыалдьан 5 киһи (1998, 2002, 2006, 2010 уонна 2011 с.т.) балыыһаҕа киирбиттэринэн бэрэбиэркэ ыытыллыбыт.
Дьону аһатар эбийиэккэ 20 санитарнай-эпидемиологическай ирдэбили кэһии булуллубут. Ол курдук ХACCП дуогабара уонна бырагыраамата, бэрэбиэркэ боротокуоллара, кытаанах хомунаалынай бөҕү-саҕы таһар дуогабар, техкаарталар, доруобуйа, сууйуу-сотуу, фритюрнай арыыны туттуу сурунааллара суохтар. Бородууксуйаны туох да докумуона, маркировката суох ылаллар, бэйэ-бэйэлэрин кытта тэҥҥэ хараллыа суохтаах бородууксуйалары бииргэ уга сытыараллара быһаарыллыбыт уонна болдьоҕо ааспыт соус булуллубут. Аһы бэлэмнээһин бырассыаһа кэһиллибит, инвентардар, остуоллар бэлиэтэммэтэхтэр, бактерициднай тэриллэр суохтар. Эбийиэк ис туруга мөлтөх (муостата алдьаммыт), инвентары харайар сир суох, сыахха үлэһиттэр тус маллара уонна ыраастыыр тэриллэрэ хараллан тураллар, бэлиэтэммит дезинфекциялыыр иһиттэр суохтар. Үлэһиттэр мэдиссиинискэй киниискэлэрэ суох.
Биир эмсэҕэлээччи быһаарбытынан, атырдьах ыйын 17 күнүгэр ити уопсастыбаннай аһыыр сиртэн шаурма атыыласпыт. Ону сиэн баран, иһэ ыалдьан барбыт, температурата тахсыбыт, убаҕаһынан ыытан барбыт. Кинини суһал көмө массыынатынан балыыһаҕа киллэрбиттэрэ.
Көмүскээччи административнай быраабы кэһии боротокуолугар сөбүлэспит, биирдиилээн урбаанньыт буруйун билиммит уонна суукка быраабы кэһии туоратыллыбытын, эмсэҕэлээбиттэргэ барыларыгар хоромньуларын төлөөбүтүн эппит.
Административнай быраабы кэһии боротокуолун оҥорбут Роспотребнадзор бэрэстэбиитэлэ бэрэбиэркэ кэмигэр технологическай бырассыаһы куруубайдык кэспиттэрин, эбийиэк санитарнай туруга мөлтөҕүн, сөптөөх сууйуу-сотуу, дьиэни хомуйуу суоҕун быһаарбыт. Үлэһиттэр тус гигиена ирдэбилин тутуспаттар, илиилэринэн туппут малларын кичэйэн сууйбаттар. Дезинфекциялыыр суурадаһыннар кэмиттэн кэмигэр суох буолаллар эбэтэр кэмчилээн туттуллаллар. Онон биирдиилээн урбаанньыт үлэтин 90 хонукка административнай өттүнэн тохтоторго көрдөспүт.
Дьокуускай куораттааҕы суут 2026 сыл атырдьах ыйын 31 күнүнээҕи уурааҕынан биирдиилээн урбаанньыт РФ Административнай быраабы кэһиилэр тустарынан кодекс 6.6 ыстатыйатынан буруйдаах диэн быһаарыллыбыт. Доруобуйаҕа, ол иһигэр сокуоннай саастарын ситэ илик оҕолорго, оҥоһуллубут дьиҥнээх хоромньуну учуоттаан туран, санитарнай кэһиилэри таһааран улахан уопсастыбаннай кутталы таһаарбытын уонна атыылаһааччы олоҕор, доруобуйатыгар дьиҥнээх кутталы оҥорбутун иһин суут накаастабыл быһыытынан биирдиилээн урбаанньыт «Ваш Лаваш» (“Донер14”) киоскатын үлэтин атырдьах ыйын 21 күнүттэн 90 хонукка тохтотто.
Уураах сокуоннай күүһүгэр киирдэ.
Дьокуускай куорат суутун пресс-сулууспата