Балаҕан ыйын 17 күнэ Мэҥэ Хаҥалас улууһун Дьаҥхаады мааны ытык сиригэр-уотугар, үтүөкэн дьоннор үөскээбит дойдуларыгар биир умнуллубат күн буолан өйбүтүгэр-санаабытыгар иҥэн хаалла.
Ол курдук, бу күн СӨ култууратын үтүөлээх үлэһитэ, Арассыыйа уонна Саха сирин Суруналыыстарын сойууһун чилиэнэ, «Көөчөөн көрө» норуодунай тыйаатыры төрүттээччи, режиссер, артыыс, худуоһунньук Дьаҥхаады нэһилиэгин, Майа сэлиэнньэтин, Мэҥэ Хаҥалас улууһун бочуоттаах олохтооҕо Аркадий Новиковка анаммыт пааматынньык турда. Норуот талаанынан ааттанан, үүнэн-сайдан тахсыбыт, норуот билиниитин ылбыт Аркадий Новиков сырдык аата үйэлэргэ Мэҥэ өйдөбүл буолан дьон сэҥээритин ылыан ылла.
Кини төрөөбүт сиригэр-уотугар, дириҥ баай устуоруйалаах Дьаҥхаады нэһилиэгэр, өҥ буордаах, сайаҕас ыалдьытымсах дьоннордоох Төхтүр сиригэр алгыһы Спиридон Григорьев-Илгэлээх Испирдиэн түһэрдэ.
Пааматынньык арыллыыта Төхтүр эрэ сиригэр буолбакка, бүтүн улууска улахан суолталаах, долгутуулаах уонна махталлаах дьыала.
Нюргустаана Владимировна уонна Николай Николаевич Филипповтар дьиэ кэргэттэрэ Аркадий Новиков сырдык уобараһын үйэтитэн, бар дьон көрүүтүгэр чочуйан таһаарбыт пааматыньыктара үйэ саас тухары үтүө өйдөбүл буолан, көлүөнэттэн-көлүөнэҕэ уос номоҕо буолуоҕа.
Пааматынньыгы үөрүүлээх быһыыга-майгыга арыйыыга Мэҥэ Хаҥалас улууһун дьокутааттарын сэбиэтин бэрэссэдээтэлэ Иннокентий Иннокентьевич Андросов, «Дьаҥхаады нэһилиэгэ» тыа сирин түөлбэтин баһылыга Алексей Никитич Шарин уонна Аркадий Новиков уола Ян Аркадьевич Новиков кытыннылар.
Мантан салгыы ахтыы биэчэрин СӨ үтүөлээх үлэһитэ, РФ Тыйаатырдарын диэйэтэллэрин сойууһун чилиэнэ Саргылана Саввична Адамова-Алтан Кыыс иилээн-саҕалаан ыытта. Аркадий Новиков «Көөчөөн көрө» норуодунай тыйаатырын урукку уонна билиҥҥи артыыстара көрдөөх сценкаларынан, уус-уран самодеятельность кыттыылаахтара ырыанан-тойугунан сэргэхситтилэр.
Биһиги кэммит биһирэмнээх киһитэ Аркадий Новиков сырдык аата үйэлэргэ тыыннаах!
«Аркадий Новиков үөрбүт мичээрэ,
Субу баар курдук сырдык мөрсүөнэ,
Сцена маанылаах сырдык сулуһа —
Дойдутун аатыгар куруук тиллэр!»
Любовь ШИШИГИНА
