Дьон-сэргэ “Элгээйи бэчиэнньэтэ” диэн билэр, киһи эрэ амсайыан баҕарар “Астык” диэн ааттаах бэчиэнньэ бүгүн номнуо Саха сирин улахан аҥарыгар атыыланар. Оттон бу бренд ааптара ким буоларын билэҕит дуо? Кини аата Туйаара Иванова – Сунтаар улууһун Элгээйи нэһилиэгиттэн төрүттээх урбаанньыт кэрэ аҥар. Бүгүн Туйаара Улус.Медиаҕа ыалдьыттыыр. “Астык” бэчиэнньэ кистэлэҥэ туохха сытар эбитий? Салгыы ааҕыҥ.
Бэйэ бородууксуйатын өрө тутан
Туйаара Иванова төрөөбүт Элгээйитин нэһилиэгэр олохсуйан үлэлии-хамныы сылдьар. Кэргэннээх, икки оҕолоох – кыыһа устудьуон, уола оскуола үөрэнээччитэ. Туйаара урбаанньыт быһыытынан 2015 сылтан үлэлээн саҕалаабыт. Ол кэмтэн бэлиэр 10-тан тахса сыл ааһан, кини дьыалата килиэп уонна араас бурдук ас бородууксуйатын оҥорон таһаарар сыахха тиийэ сайдыбыт.
“Мин ийэм Софья Михайловна Иванова кондитер идэлээх – кини мин ыра санаам көҕүлээччитэ буолар. 2015 сылга ийэм үлэлиир нэһилиэкпит биир бас-көс тэрилтэтэ, Элгээйи сельпота ликвидацияҕа барарын туһунан биллэрбитэ. Ийэбэр үлэтэ суох хаалар куттал үөскээн, миэхэ итэҕэлэ улахан буолан, бэйэбит кондитерскай сыах арыныахха диэн санаатын эппитэ. Саҥаһым Генриетта Гермогеновна Осипова конкурснай управляющай көмөлөһөөччүтүнэн анаммыта. Ол табыгастаах кэми мин мүччү туппатаҕым. Онон ликвидацияҕа барбыт тэрилтэ дьиэтин, туттар тээбиринин арендалаһан үлэлээн саҕалаабыппыт”, — диэн ахтар Туйаара.
Билигин Ивановтар сыахтарыгар килиэптэн саҕалаан чебурекка, оннооҕор хачапурига тиийэ араас ас эгэлгэтин оҥорон таһаараллар: “Минньигэс бурдук ас арааһа барыта баар – заварнойдар, пончиктар, тортар, бэчиэнньэлэр… Атын сыахтартан саамай сүрүн уратыбыт диэн биһиги аспытын астыырбытыгар бэйэбит фермабыт сырьетун туттабыт. Сүөгэйбит, арыыбыт, үүппүт, эппит – барыта бэйэ хаһаайыстыбатыттан”.
“Бурдук аһы астаабат киһибин…”
Урбаанньыт кыыс үлэһиттэрбин хас биирдии салайааччы курдук ирдэбил быһыытынан хонтуруоллуубун диэн билинэр. Үлэни сатабыллаахтык дьаарыстыыр, салаа-салаанан арааран туспа үлэһиттэргэ сорук туруорар буолан Туйаара сыахха ас астааһыныгар кыттыспат.
“Үгүс дьон бэйэбин ас бөҕөтүн астыыр дии саныыллар, чиэһинэ билинэбин, бурдук аһы астаабат киһибин, дьиэбэр хаһан эмэ, сыл баһыгар атаҕар диэбиккэ дылы, пицца астыахпын сөп. Үйэбэр биирдэ бэрэски астаан көрбүтүм уонна аккаастаммытым. Онон мин үксүн творческай уонна салайыы өттүгэр дьоҕурдаах урбаанньыппын”, — диир кини.
“Биһиги кыра эрдэхпитинэ бэйэ дьыалатын арыйыы диэн өйдөбүл төрүт суох этэ. Кэлин баар буолбут. Ол иһин туспа бренд эҥин диэн отой даҕаны толкуйдаабат буоллаҕым. Бэйэ дьыалатын арынарбар миэхэ чугас дьонум төһүү күүс буолбуттара – кинилэргэ күн бүгүҥҥэ диэри махталым муҥура суох”.
Дьон сүрэҕин сүүйбүт “Астык” бэчиэнньэ кистэлэҥэ
“Астык” бэчиэнньэ кистэлэҥин, “секретнэй ингредиенын” киһи бары билиэн баҕарара биллэр дьыала.
“Холобур, бу бүтэһигин биир убаастыыр киһим, аҕам бииргэ үөрэммит киһитэ суруйбута. Кини кийиитэ Новосибирскай куорат олохтооҕо, бу «Астык» Элгээйибит бэчиэнньэтин амсайан, сөбүлээн, дойдутугар баран, наһаа ахтан, бэйэтэ оҥоро сатаабыт даҕаны сатамматах. Ону ийэлэриттэн көрдөһөллөр үһү: “Бука диэн Туйаараттан рецебын ыйыталас, сатанымаары гынныбыт”, — диэн. Ол курдук добуччу соҕус Элгээйибит бэчиэнньэтин сакаастаан ылан, Новосибирскай куоракка ыыппыттара”, — диэн бэрт интэриэһинэй чахчыны кэпсиир Туйаара.
Онуоха, Туйаара этэринэн, кинилэр кистэлэҥнэрэ диэн – ийэтэ уонна саҥаһа урут үөрэппит сэбиэскэй ГОСТ рецептарын кэм-дьыл ааспытын да иһин уларыппакка эрэ көлүөнэттэн көлүөнэҕэ бэрсэ сылдьаллара буолар: “Уонна, упаковкаларбытыгар сурулла сылдьарыныы, барытын ис сүрэхтэн астыыбыт”.
Билиҥҥи туругунан “Астык” бэчиэнньэ уонна атын да бородууксуйата өрөспүүбүлүкэ улахан аҥарыгар атыыланар. Сүрүннээн Сунтаар, Ньурба,Үөһээ Бүлүү, Бүлүү, Горнай, Дьокуускай, Нам, Мэҥэ Хаҥалас, Хаҥалас, Уус Алдан, Амма, Чурапчы улуустарыгар тарҕаталлар эбит. Аҥардас Дьокуускайга бу минньигэс бэчиэнньэни 20-тэн тахса маҕаһыыҥҥа булуохха сөп. Маны таһынан, суол хайдаҕыттан көрөн, Өлөөн, Өймөкөөн, Томпо улуустарыгар тиэрдэллэр.
Саҥа сыал — Россия таһымыгар тахсыы
“Мин дьыалам – мин “Астыгым” – сүрэҕим сылааһа диэн эппэтэхпинэ табыллыбат. Бу мин дьыалам эрэ буолбатах – бу мин оҕом кэриэтэ. Кырдьыктыы, оннук да буолар ээ, кини эмиэ оҕоҥ курдук тапталы, болҕомтону, сөптөөх салайыыны, убаастабылы, бириэмэни, сиэрдээх сыһыаны, кырдьыгы эрэйэр”, — диир Туйаара Иванова.
Инникитин урбаанньыт үлэтин өссө күүһүрдэр былааннаах:
“Билигин килиэп оҥорон таһаарааччы бэкээринэлэргэ диэн судаарыстыбаннай субсидияҕа “На возмещение части затрат” диэн сайабылыанньа биэрдибит. Атыылаһааччыга хаачыстыбалаах аһы тириэрдэр сыалтан, кэмиттэн кэмигэр туттар тээбириннэрбитин саҥардыахпытын наада, онно олус элбэх харчы барар. Субсидияҕа тигистэхпитинэ, бүгүҥҥү сыана үрдүү турар бириэмэтигэр сыанабытын тутуо, үлэ да миэстэтин хаалларыа этибит диэн бигэ эрэллээхпит”.
Түмүккэ Туйаара биир чаҕылхай баҕа санаатын эттэ.
“Саамай улахан баҕа санаам – “Астык” Элгээйи бэчиэнньэтин Саха сирин таһымыттан таһааран, бүттүүн Россия үрдүнэн атыыга ыытан, норуот сүрэҕин ылыы”, — диэн кини бэлиэтиир. Дьыалатын туһугар ис сүрэҕиттэн долгуйар, дьон үрдүк хаачыстыбалаах, бэйэ бородууксуйатыттан оҥоһуллар аһы сиирин туһугар үлэлии-хамныы сылдьар эдэр киһиэхэ Туйаара Ивановаҕа ситиһиини баҕарыаҕыҥ!
Сообщение “Мин дьыалам – сүрэҕим сылааһа”: астык ааттаах “Астык” бэчиэнньэ ааптара Туйаара Иванова появились сначала на Новости Якутии и Якутска — свежие новости онлайн на сайте ulus.media — Улус Медиа.