«Биир ньыгыл Арассыыйа» баартыйа Норуот бырагырааматыгар быйылгы көрдөрүү 2021 сыллаахха киирбит этиилэрин ахсааннарын куоһарда диэн бэлиэтээтэ баартыйа бэрэссэдээтэлэ Экспертэр сүбэлэрин мунньаҕар.
«Этиилэр ордук элбэх ахсааннара дойду эрэгийиэннэрин сайдыыларыгар туһуланар. Бу кыһалҕаны быһаарар туһугар Арассыыйа дьиэ кэргэттэригэр олорорго табыгастаах усулуобуйалары хааччыйыахха наада», — диэн быһаарда Дмитрий Медведев.
Маны таһынан сийиэс бастакы түһүмэҕэр норуот бырагырааматыгар киирбит этиилэри дьүүллэстилэр. Бырагыраама бүтэһиктээх барылын иккис түһүмэххэ атырдьах ыйыгар ылыныахтара.
«Биир ньыгыл Арассыыйа» баартыйа «Норуот бырагыраамата» биир киһи хапытаалыгар уонна инники күөҥҥэ турар боппуруостарга туһуланар. Саха сиригэр бу кыһалҕалары, эрэгийиэн уратытын учуоттан, систиэмэлээхтик федеральнай механизмнарынан быһаарар кыаҕы биэрэ. Салгыы көҕүлээһиннэри чочуйан ырытыы муниципалитеттары уонна олохтоохтору кытта тиһиктээхтик ыытыллара улахан суолталаах: маннык кэпсэтии эрэ дьиҥ норуот бырагырааматынан уонна миэстэтигэр муҥутуур көдьүүстээх оҥорор. Үс мөлүйүөн кэриҥэ этии – бу көннөрү сыыппара буолбатах, бу дьон дойду сайдыытын күннээҕи соруктарын торумнааһыҥҥа төһө көхтөөхтүк кытталларын ырылхай туоһута. Экспертэр болҕомтолоро билигин сүрүннээн дойду территорияларын тэҥэ суох сайдыыларын кыһалҕаларын быһаарыыга туһуланар. Улуустар олус ыраах сыталлара, тыйыс усулуобуйалаах килиимэт уонна экэниэмикэ уратылардаах усулуобуйаларыгар федеральнай көҕүлээһиннэр өрөспүүбүлүкэҕэ ураты суолталаналлар. Саха сиригэр нэһилиэктэр сайдыыларын тэҥэ суоҕа, бөдөҥ куораттар уонна ыраах Арктика бөһүөлэктэрин икки ардыларыгар раас балаһыанньалаахтарын быһыытынан, туруктаах энергетика уонна тырааныспар ситимэ суоҕа улахан кыһалҕанан буолар. Онон мобильнай кыра энергетиканы сайыннарыы уонна транс-арктикатааҕы тырааныспар көрүдүөрүн тэрийии – бу көннөрү былааннар буолбатахтар, бу территориялар олохторун усулуобуйаларын тэҥниир дьиҥнээх механизмнар. Кинилэр хотугу таһаҕаһы таһыы, тарыыптар уонна табыгаһа суох сирдэргэ хаһаайыстыбаннай үлэни ыытыы эрэллээх буолууларыгар быһаччы дьайаллар», – диэн бэлиэтээтэ «Биир ньыгыл Арассыыйа» баартыйа эрэгийиэннээҕи ситэриилээх кэмитиэтин салайааччыта Надежда Селютина.