Муус устар 18 күнүгэр өрөспүүбүлүкэбит киин куоратыгар, «Квартал труда» айар кластерга, цифровой индустрия исписэлиистэрэ, устудьуоннар уонна информационнай технологияны интэриэһиргиир дьоҥҥо аналлаах тэрээһин буолуоҕа. Саха сиригэр саамай киэҥ хабааннаах «DriveeCon» IT-конференцияҕа тыһыынчаттан тахса киһи мустуоҕа. Бу туһунан «Кыым» хаһыат суруйар.
Тэрийээччилэр этэллэринэн, бу тэрээһин санаа атастаһар, саҥа идеялары саҕар уонна туһалаах билсиилэри олохтуур площадка быһыытынан сыаналанар.
«Кыым» хаһыат кэриспэндиэнэ Петр Лукачевскайы, кэмпириэнсийэ тэрийээччитин кытта кэпсэттэ. Классическай форумнартан тугунан уратылааҕын уонна ситиһии төрдө ханна сытарын ырытта.
«Кэмэ кэлбитин биллилэр»
«DriveеCon» тэрийэр санаалара биир сыл эрэ буолбакка, өр кэмҥэ буспут-хаппыт эбит. Саха сиригэр күүстээх IT-түмсүү баар, саҥа хамаандалар, бородуукталар, исписэлиистэр үүнэн тахсаллар. Кинилэр эрэгийиэн иһигэр эрэ буолбакка, Арассыыйа уонна Аан дойду таһымыгар тахсан үлэлииллэр. Ол эрэн, бары бииргэ мустан, тыыннаахтык кэпсэтэр биир сирдэрэ суох эбит.
«Албыннаабакка эттэххэ, кэмэ кэлбитин эрэ билбиппит, — диэн кэпсииллэр тэрийээччилэр. — IT диэн ыарахан кодтары суруйуу эрэ буолбатах диэни көрдөрүөхпүтүн баҕарабыт. Бу — олох бары өттүгэр дьайар улахан индустрия. Ону таһынан, эдэр ыччакка: “Саха сириттэн барбакка эрэ, IT-га сайдыахха сөп” диэн санааны иҥэриэхпитин баҕарабыт».
«DriveеCon» бастатан туран классическай конференция быһыытынан былааннамматах
Тэрийээччилэр бу форматтан аккаастаммыттар.
«Дакылааттар көмүскэниэхтэрэ, ол эрэн бу тэрээһин сүрүн чааһа буолбатах, — диэн бэлиэтииллэр. — Биһиги бу тэрээһиҥҥэ дьон бэйэ-бэйэтин кытта быһаччы кэпсэтэригэр, түргэнник билсиһэригэр уонна саҥа дьыаланы тэҥҥэ ырытарыгар аналлаах элбэх площадканы тэрийэбит. Манна кэлбит хас биирдии киһи бэйэтигэр туһалааҕы булуо: саҥа хамаанданы эбэтэр үлэни, кэскиллээх партнердары, эбэтэр саҥа санааҕа тириэрдэр дьиҥнээх күүс-уох төрдүн. Дьон тэрээһини аҥаардас көрөн-истэн эрэ хаалбатын туһугар, тэрээһиҥҥэ бары бииргэ үлэлэһэн, туһалаах түмсүү буоларыгар кыһанабыт».
Спикердары хайдах таллылар?
Хаартыска: DriveeCon официальнай саайт
Кыттааччылары талыыга тэрийээччилэр үс сүрүн көрүүгэ олоҕурбуттар: спикер дьиҥнээх уопута, тиэмэтэ билиҥҥи олох ирдэбилигэр эппиэттиир буоллаҕына уонна киһи өйдүүрүн курдук судургутук кэпсиир дьоҕура.
«Биһиги бэстибээлбит хайысхатын кэҥэттибит, — диэн бэлиэтииллэр тэрийээччилэр. — Бэстибээлбит IT эрэ эйгэтинэн муҥурдаммат. Холобур, психологтар кэлэн, идэлээх дьон үлэлэриттэн сылайыыларын (выгорание) хайдах туоратыахха сөбүн кэпсиэхтэрэ — бу биһиги үлэбит уонна олохпут салгыы сайдарыгар олус наадалаах сорҕото буолар».
«Саха сиригэр үлэлиир исписэлиистэргэ тыл биэрэрбит олус суолталаах. Дойдубутугар IT хайысхатыгар күүстээх, дьоҕурдаах эдэр ыччат элбэх, ол эрэн кинилэр тустарынан ким да билбэт. DriveeCon бу быһыыны көннөрүөхтээх».
«DriveeCon» кэлиҥҥи концепциятын сүрүн сорҕотунан улахан IT-хампаанньалар экспертэрин уонна биллэр блогердары ыҥырыы буолар. Федеральнай таһымнаах ыалдьыттар кэлэллэрин туһунан бигэргэтии баар. Ол эрэн, тэрийээччилэр форумҥа киэҥник биллибит дьон кэлиилэригэр охтубат буола сатыыллар — кинилэр олохтоох спикердар уопуттарын уонна кыахтарын арыйарга ордук болҕомтолорун уураллар.
Форумҥа суруттарбыт дьон ахсаана рекорд олохтуур
Хаартыска: DriveeCon официальнай саайт
Форумҥа сурутуу олус көхтөөхтүк бара турар, онон тэрийээччилэр сэрэтэллэр: миэстэ хааччахтаах.
«Истээччилэрбит тустарыгар, форумҥа истиҥ, тыыннаах атмосфераны олохтуохпутун баҕарабыт — диэн быһаараллар. — Билигин кэмириэнсийэҕэ сурутуу туолуох курдук, онон суруттарыыны кэнникигэ хаалларымаҥ».
Өйдөтөбүт: кыттыы босхо, ол эрэн эрдэттэн суруттарыы ирдэнэр.
Тэрийээччилэр кимнээхтэрий?
«DriveeCon» — бу биир хампаанньа көҕүлээһининэн эрэ ыытыллар буолбатах. Манна IT-түмсүү, бизнес, үөрэх бырайыактара уонна судаарыстыбаннай өйөбүл холбоһоннор, форуммутун тэрийэн эрэбит.
«Бу биир тэрилтэ туһунан кэпсээн буолбатах, — диэн бэлиэтииллэр тэрийээччилэр. — Дьиҥинэн, IT-түмсүү уопсай барыла буолар. Эрэгийиэҥҥэ цифровой сайдыы туһугар ыалдьар, саҥаны айар баҕалаах дьон уонна тэрилтэлэр бу түмүккэ бары кыттыһаллар.
Тэрээһин бырагыраамата:
Кыттааччылары күүтэр:
- Федеральнай уонна олохтоох спикердар кэпсэтиилэрэ. Саха сирин исписэлиистэрэ оҥорон таһаарбыт бородуукталарын уонна IT-эйгэҕэ хайдах тиийбиттэрин кэпсиэхтэрэ;
- Data Science, ML, AI, графическай дизайн, цифровой маркетинга, HR уонна технологическай урбаан хайысхаларыгар дириҥ ис хоһоонноох лекциялар уонна маастар-кылаастар;
- «IT эйгэтигэр ханнык идэлэр баалларый?» диэн воркшоп — бу ордук оскуола үөрэнээччилэригэр уонна устудьуоннарга туһалаах;
- CS2 кибертурнир (ыалдьыттары хомуйуу 11:00 чаастан, күрэхтэһии 15:00 диэри буолуоҕа), ону тэҥэ саха геймдев-разработчиктарын оонньуулара;
- Нетворкинг зоната — Дьокуускай IT-хампаанньаларын салайааччыларын кытта быһаччы кэпсэтии, уопут атастаһыы, ону таһынан үлэлиир сиргин буолуоххун сөп.
Официальнай түмүктээһин (19:20) кэнниттэн ыалдьыттары кэнсиэр күүтэр.
Хаартыска: DriveeCon официальнай саайт
Бу тэрээһин кимиэхэ аналлааҕый?
DriveeCon – IT-исписэлиистэргэ, идэлээх уонна IT-эйгэтигэр чугаһыан баҕарар устудьуоннарга, стартапердарга, маркетологтарга, дизайнердарга уонна аныгы технологияны сэргиир хас биирдии киһиэхэ аналлаах. Тэрийээччилэр бэлиэтииллэринэн, конференция туһалаах буолуутун таһынан, чэпчэки, хааччахтааһына суох тыыннаах тэрээһин буолуоҕа.
Ханна уонна хаһан?
- Күнэ: Муус устар 18 күнэ, 2026 с.
- Сирэ: Дьокуускай, «Квартал труда»
- Бириэмэтэ: Аһыллыыта 12:00, площадкалар 19:00 чааска диэри үлэлииллэр.
- Кыттыы: Босхо, ол гынан баран эрдэттэн регистрацияланар наада.
Сиһилии бырагыраама кэмпириэнсийэ саайтыгар: https://driveecon.ru/
«Кыым» хаһыат сүбэлиир: бу тэрээһин Саха сирин IT-эйгэтигэр улахан хардыы буолуоҕа. Көтүтүмэҥ!
Бэй.кэр.
Сообщение Дьокуускайга бастакытын IT-конференция – «DriveeCon» ыытыллыаҕа появились сначала на Улус Медиа.