Бүгүн, атырдьах ыйын 4 күнүгэр, Саха сирин Бастакы Бэрэсидьиэнэ, өрөспүүбүлүкэбит улуу киһитэ Михаил Ефимович Николаев олохтон туораабыта үс сыла буолла.
Бу туһунан Дьокуускай куорат баһылыга Дмитрий Садовников бэйэтин социальнай ситимигэр суруйда. Кини бэҕэһээ Михаил Ефимовиһы кытта үлэлээбит, бииргэ алтыспыт дьоннорун — Климент Егорович Иванову уонна Василий Иннокентьевич Сорокоумовы кытта көрсүбүт.
«Олоҕун «иннинэ» уонна «кэнниттэн» диэн араарар күннэр баар буолаллар. Бүгүн чуолаан оннук күн. Бэҕэһээ миэхэ Бастакы Бэрэсидьиэни кытта саамай саҕаланыытыттан бииргэ буолбут дьоннорбут Климент Егорович уонна Василий Иннокентьевич ыалдьыттыы киирэ сырыттылар. Үгүһү кэпсэттибит, ол эрээри саамай сүрүнүттэн — Михаил Ефимович сырдык аатын кэлэр көлүөнэлэргэ харыстаан хаалларыыттан саҕалаатыбыт», — диэн куорат баһылыга бэлиэтиир.
Бастакы Бэрэсидьиэн аатын үйэтитии үлэтэ Саха сирин Ил Дархана Айсен Сергеевич Николаев Ыйааҕын чэрчитинэн ыытыллар. Сэһэргэһии түмүгүнэн, сотору кэминэн Михаил Ефимович олорбут дьиэтигэр мемориальнай дуоска туруорулларын туһунан сөбүлэһиигэ кэлбиттэр.
Ону тэҥэ Дмитрий Садовников ытык, үтүөлээх дьон куорат салгыы сайдыытыгар бэйэлэрин көрүүлэрин, алгыстарын уонна сүбэлэрин-амаларын эппиттэрин тоһоҕолоон бэлиэтээтэ. «Бу улуу дьон көрүүлэрэ уонна кинилэр итэҕэллэрэ олус сыаналаах. Михаил Ефимович туһунан өйдөбүл гранит пааматынньыктарга эрэ буолбакка, биһиги күннээҕи дьыалаларбытыгар, үлэбитигэр тыыннаах буолуохтаах. Бастакы Бэрэсидьиэммитигэр сырдык өйдөбүл буоллун!» — диэн Дмитрий Садовников түмүктээтэ.