Иркутскай уобалас Бодайбо оройуонугар ойууру үөһэттэн кэтии сылдьан сүппүт «Cessna 182» сөмөлүөтү көрдүүргэ Саха сириттэн көтөр аал көттө.
Сүппүт сөмөлүөт иһигэр икки киһи баара биллэр: кэтээн көрөр лүөччүк уонна сөмөлүөт хамандыыра.
Трекер көрдөрүүтүнэн, экипаж Бодайботааҕы лесничествоҕа баһаар турбут сирин үөһэттэн кэрийэн көрбүт, ол кэннэ Бодайбо куорат диэки айаннаабыт. Куорат үрдүнэн биир эргиири оҥорон баран, соҕуруулуу-илиҥҥи өттүгэр сүппүт. Тиһэх координатата атырдьах ыйын 3 күнүгэр күнүс 13:58 чааска бэлиэтэммит, онтон ыла сибээскэ тахсыбатах.
Билиҥҥи туругунан сүппүт сөмөлүөтү көрдөөһүҥҥэ Саха сириттэн анаан-минээн сөмөлүөт ыытылынна. Ону тэҥэ көрдөөһүн-быыһааһын үлэтигэр эбии икки бөртөлүөт кыттыһара күүтүллэр.