Байаҕантай нэһилиэгэр Сэбиэскэй Сойуус Дьоруойа Ф.М.Охлопков аатынан Кириэс-Халдьаайы орто агрооскуолатын 10 кылааһын оҕолоро Виктор Харлампьев хаһаайыстыбатыгар баран, күүс-көмө буолан кэллилэр.
Томпо улууһун Байаҕантай нэһилиэгэр билигин сүөһүнэн дьарыктанар улахан уонна кэтэх хаһаайыстыбаларга төрүөх үксээн, үүт бородууксуйата маҕаһыыннарга атыыга тахсар, дьон бэйэ оҥорон таһаарбыт, иҥэмтэлээх аһын хамаҕатык атыылаһар. Бу туһунан биһиги ааҕааччыбыт, Кириэс-Халдьаайы орто оскуолатын агроүөрэхтээһиҥҥэ директоры солбуйааччы Матрена Бысыина суруйар:
— Төһө да оттуур сир тиийбэтэр, от үүммэтэр, уһун кыһыҥҥа араас кыһалҕалары көрүстэллэр, балаһыанньаттан тахсан сүөһүлэрин эспэккэ үлэлии олороллоро хайҕабыллаах дьыала. Ол курдук, билигин Охлопков Трофим Трофимович, Тополин Николай Власьевич, Харлампьев Виктор Николаевич, Атаков Сергей Гаврильевич бааһынай хаһаайыстыбалара бэйэлэрин бородууксуйаларын «Илгэ» тыа хаһаайыстыбатын потребительскай кооперативыгар, (салайааччы Кузьмин Анатолий Николаевич) туттараннар, арыы, сүөгэй, кефир, йогурт, творог атыыга таһааран, нэһилиэккэ эрэ буолбакка, оройуоҥҥа уонна Дьокуускай куоракка батараллар.
Бу күннэргэ Сэбиэскэй Сойуус Дьоруойа Ф.М.Охлопков аатынан Кириэс-Халдьаайы орто агрооскуолатын 10 кылааһын оҕолоро, (кылаас салайааччыта Слепцова Анна Александровна) агроүөрэхтээһиҥҥэ директоры солбуйааччы Бысыина Матрена Егоровна, “животноводство” үөрэҕи таһынан дьарыкка үөрэтэр учуутал Заболоцкая Туяра Михайловна буоланнар, Ынахсыкка баар Харлампьев Виктор Николаевич хотонугар баран, саҥаны элбэҕи көрөн, үөрэтэн, ньирэйдэри аһатан, ходуул ыраастаан кэллилэр. Биир хотоҥҥо элбэх сүөһүнү көрөн интэриэһиргээтилэр, астыннылар. Билигин нэһилиэккэ чааһынай дьон сүөһү иитэллэрэ аҕыйаан, оҕолорбут чугастан сүөһүнү тутан-хабан көрүүлэрэ да суох буоллаҕа дии. Ол иһин кинилэргэ барыта сонун, интэриэһинэй буолла, кыргыттар ньирэй аһатан үөрдүлэр. Үлэҕэ маннык кылааһынан сылдьаллара көхтөөх уонна оскуоланы да бүтэрдэхтэринэ өйдүү-саныы да сылдьалларыгар үтүө өйдөбүл буолар. Ыарахан үлэҕэ сылдьар дьоҥҥо кыра да көмө наада дии саныыбын. Билигин саамай ыктара сылдьар кэмнэрэ, элбэх ынах төрөөн турар кэмэ.
Хаһаайыстыбаҕа кыһалҕалара элбэх, ол курдук хотонноро умайан, ньирэйдэр турар сирдэрэ суох буолан, хотон кытыытыгар бааллан тураллар. Ол иһин төрөөбүт ньирэйдэрин сороҕун дьоҥҥо биэрбит, сороҕун атыылаабыт. Хаһаайыстыба сайдарыгар саҥа хотон тутуллуон наада эбит. Аны саамай сүрүн кыһалҕалара үлэһит илии тиийбэтэ буолар. Өссө совхоз эрдэхтэн үлэлиир ыанньыксыттар бааллар, эр дьон тиийбэт эбит. Ол да буоллар, үлэлии үөрэммит дьон буолан, санаалара бөҕөх, эти-үүтү дэлэтиигэ баҕалара баһаам, былааннара киэҥ.
Сообщение Кириэс-Халдьаайы ыччата хаһаайыстыбаҕа көмөлөстө появились сначала на Улус Медиа.