Чугас киһигит өйгө тутар дьоҕура сүтэн эрэрин хайдах билиэххэ? Онуоха дьиэҕэ судургу тиэһи хайдах оҥоруохха? Түөһэйбит киһини хайдах көрүөххэ-истиэххэ? Мантан да атын ыйытыыларга хоруйу ыларга эһигини туһалаах кэмпириэнсийэҕэ ыҥыраллар.
«Долгожить» АНО уонна Өрөспүүбүлүкэтээҕи 3 №-дээх килиниичэскэй балыыһа кырдьаҕас дьоҥҥо уонна кинилэр дьиэ кэргэттэригэр «Деменция: знание, поддержка, действие» диэн сырдатар, кэпсиир кэмпириэнсийэни ыытыахтара.
Муус устар 23 күнүгэр 10.00 чаастан Н.Неустроев аатынан Киин бибилэтиэкэҕэ (203 мкр. Ларионов уул. 12 а) ыытыллар кэмпириэнсийэҕэ кэлбит дьон туһааннаах исписэлиистэр сүбэлэрин-амаларын истиэхтэрэ, кинилэргэ чопчу көмөлөһүөхтэрэ.
Сүрүн иһитиннэриилэри «Долгожить» АНО дириэктэрэ Наталия Каратаева, психоневрология диспансерын психиатр-бырааһа Валентина Егорова, мэдиссиинэ психолога Евгения Львова, өрөспүүбүлүкэтээҕи 3 №-дээх килиниичэскэй балыыһа невролог-бырааһа Виктория Местникова уо.д.а. оҥоруохтара.
Тэрийээччилэр этэллэринэн, кэмпириэнсийэҕэ кэлбит киһи соҕотох хаалыа суоҕа, кини салгыы сүбэ-ама ыларга суруйтарыан сөп, саҥа үөрүйэхтэри иҥэриниэҕэ. Манна иҥэриммит билиитин дьиэтигэр кэлэн чугас дьонун кытары үллэстиэҕэ, туһаныаҕа.