Дьокуускайга Саха сирин муниципальнай тэриллиилэрин сийиэһин чэрчитинэн ыытыллыбыт муниципальнай хамаандалар үөрэхтэрин пуорума ыытылынна. Тэрээһин куорат уокуруктарын, оройуоннарын уонна нэһилиэктэрин баһылыктарын, ону таһынан олохтоох салайыныы салаатын исписэлиистэрин түмтэ.
Пуорум кыттыылаахтарыгар «Муниципальное правотворчество и юридическая поддержка местного самоуправления: вызовы и решения» диэн тиэмэҕэ сиэссийэ ыытылынна. Сиэссийэ чэрчитинэн олохтоох салайыныы уорганнарыгар быраап нуорматын оҥоруу үлэтигэр методическай көмөҕө сыһыаннаах боппуруостар дьүүллэһилиннилэр. СӨ Госкомюстициятын бэрэссэдээтэлэ П.В. Иванов нормативнай быраап уонна коррупцияны утары экспертизалар тутаах өрүттэрин туһунан кэпсээтэ. СӨ борокуруорун ыстаарсай көмөлөһөөччүтэ Э.Н. Ларионов экспертиза кэмигэр көстөр сүрүн кэһиилэргэ болҕомтотун ууран, олору туоратыы суолларын туруоруста. Судаарыстыбаннай быраап боппуруостарын департаменын салайааччыта О.В. Романова олохтоох салайыныы эйгэтигэр сокуону олоххо киллэрии тирээн турар суолталаах боппуруостарын быһааран кэпсээтэ.
Пуорум кэмигэр пуорум кыттыылаахтара СӨ Конституционнай сэбиэтин бэрэссэдээтэлэ П.В. Гоголевы кытары көрүстүлэр, өрөспүүбүлүкэ нэһилиэнньэлээх пууннарыгар гражданскай уопсастыба уонна ыччат институттарын өйүүр дьаһаллар тустарынан кэпсэттилэр.
Күн иккис аҥарыттан пуорум публичнай былаас систиэмэтин сыаннастарын салайыыга болҕомтотун уурда. Спикердэр муниципальнай тэриллиилэр бүддьүөт өттүнэн хааччыллыыларын боппуруостарын уонна олохтоох бүддьүөт дохуоттарын үрдэтии механизмнарын дьүүллэстилэр.
Ону таһынан пуорум кыттыылаахтарыгар аналлаах практическай тэрээһиннэр буоллулар. «Муударай баһылык» хайдах буолуохтааҕын – истэр, итэҕэтэр ускуустуба», «Күннээҕи үлэҕэ оҥоһуу өйү туһаныы», о.д.а практикумнарга баһылыктар билиилэрин хаҥаттылар.
Пуорум түмүктэри таһаарыынан уонна кыттааччыларга сэртипикээттэри туттарыынан түмүктэннэ. Бу муниципальнай хамаандалар компетенцияларын бөҕөргөтүүгэ уонна өрөспүүбүлүкэ араас эрэгийиэннэрин икки ардыларыгар уопут атастаһыыга дьоһун хардыынан буолла. Кыттааччылар тэрээһин үрдүк практическай сыанатын уонна уопут атастаһар кыаҕын бэлиэтээтилэр.