Бу күннэргэ Дьокуускай куоракка Саха сирин олохтоох дьаһалталарын сэбиэтин X сийиэһэ үрдүк таһымнаахтык буолан ааста. Бу суолталаах тэрээһиҥҥэ өрөспүүбүлүкэ бары улуустарын баһылыктара, бэрэстэбиитэллэрэ, федеральнай уонна эрэгийиэннээҕи экспердэр кытыннылар.
Сийиэс түмүгүн туһунан Үөһээ Бүлүү улууһун баһылыга Валерий Николаев бэйэтин санаатын маннык үллэһиннэ:
— Сийиэс үлэтигэр билигин улуустар икки ардыларынааҕы бииргэ үлэлээһини күүһүрдэр, бастыҥ уопуту атастаһар уонна олох хаачыстыбатын тупсарар суоллары бииргэ көрдүүр олус суолталааҕын бэлиэтээтим. Дьүүллэһэр былаһааккалар, төгүрүк остуоллар, трениннэр, ону таһынан экономика уонна социальнай эйгэ араас хайысхаларыгар тэрээһиннэр ыытылыннылар. Бырабыыталыстыба чааһыгар нэһилиэктэр уонна оройуоннар баһылыктара Бырабыыталыстыбатын чилиэннэригэр, биэдэмэстибэлэр салайааччыларыгар быһаччы ыйытыылары биэрэн, сөптөөх хоруйдары ыллылар. Биһиги, баһылыктар, үгүспүт кыһалҕата биир – нэһилиэктэри гаастааһын, территорияны сайыннарыыны былааннааһын, социальнай эбийиэктэри уонна суоллары тутуу, киин ититиигэ холбооһун уо.д. а. Биһиги ордук муниципальнай өҥөлөрү сыыппара эйгэтигэр көһөрүү, тырааныспар уонна социальнай инфраструктураны сайыннарыы, ону таһынан тыа сирин өйөөһүн боппуруостарыгар кэпсэттибит. Сийиэс күүспүтүн түмэн муниципалитеттар иннилэригэр турар соруктары табыллан быһаарар кыахтаахпыт бигэргэттэ. Биһиги сүрүн сыалбыт – туруктаах сайдыы, төрүт үгэстэри харыстааһын уонна Саха сирин олохтоохторун олоҕун тупсарыы. X сийиэс түмүгүнэн Саха сирин олохтоох дьаһалталарын үлэлэрэ саҥа таһымҥа тахсарыгар, бэйэ-бэйэбитин өйөһөн сайдарбытыгар олук уурулунна. Олус үрдүк таһымнаах тэрээһин буолан ааста диэн сыаналыыбын. Сийиэс бары кыттыылаахтарыгар аһаҕас кэпсэтии уонна өрөспүүбүлүкэбит туһугар бииргэ үлэлииргэ бэлэмнэрин иһин махталбын биллэрэбин.