Дьокуускайга оҕо айымньытын дыбарыаьыгар «Зал иһин толорор музыка» ырыатынан дьоҥҥо-сэргэҕэ киэҥник биллибит СӨ култууратын үтүөлээх үлэһитэ, кэрэ куоластаах ырыаһыт А.И.Дмитриев-Таммах төрөөбүтэ 70 сылыгар ураты истиҥ тэрээһин буолла.
Кини доҕотторо,чуолаан поэт А.Старостин-Сиэн-Кынат, Люция Петровна көҕүлээһиннэринэн олус үчүгэй кэнсиэр дьону-сэргэни түмтэ. Саала Таммах ырыатын сөбүлээн истээччилэринэн туолла.
Таммах айбыт «Үҥкүүлүөх бу киэһэ иккиэйэх» ырыатын СӨ култууратын үтүөлээх артыыһа Владимир Заболоцкай ыллаабытын көрөөччүлэр дохсун ытыс тыаһынан арыаллаатылар. Маны сэргэ, кэнсиэргэ ааптар бэйэтэ ыллыырын устубуттарын холбообуттара көрөөччүлэри долгутта. Манна үһүс саас оскуолатын бэтэрээннэрэ уонна эдэр дьон үҥкүүлээбиттэрэ ураты кэрэ буолла. Үҥкүүнү Мария Соловьева туруорбут. Кэнсиэри Роман Алексеев -Амор иилээн-саҕалаан ыытта.
Кэнсиэр саҕаланыытыгар видеонан Александр Дмитриев огдообото Ольга Семёновна Дмитриева Аллараа Халыматтан көрөөччүлэргэ сааскы кэрэ күннэринэн истиҥ эҕэрдэтин тиэртэ, тэрээһиҥҥэ мустубут ыалдьыттарга махтанна. Тэрээһиҥҥэ Таммах бииргэ үөрэммит доҕотторо, биир дойдулаахтара кыттыыны ыллылар. СӨ култууратын үтүөлээх артыыһа П. Неустроев, РФ норуодунай артыыһа А.Емельянов, СӨ үтүөлээх артыыһа Игорь Егоров, СӨ култууратын туйгуна Н.Андросов, уо.д.а. кыттыыны ылбыттара тэрээһини ситэрэн-хоторон биэрдэ. Сиэн Кынат, Люция Петровна Таммах туһунан ахтыы кинигэни хомуйан оҥорбуттарын уонна «Дьылҕам дьикти бэлэҕэ»кинигэни тутан үөрдүбүт.
Истиҥник саныыр, ытыктыыр дьоммутугар Люция Петровнаҕа, Анатолий Гаврильевичка бу истиҥ тэрээһини, бэртээхэй кэнсиэри тэрийбиттэригэр махтанабыт.
Фаина Ширяева, Анастасия Осипова
Хаартыска Ф.Ширяева тиксэриитэ