«Сиэрдээх Арассыыйа» фракцияттан Госдуума дьокутааттара суһал көмө үлэһиттэригэр биэнсийэҕэ эрдэ тахсалларыгар быраап биэрэргэ, ол эбэтэр тыа сиригэр 20 сыл, куорат отделениеларыгар 25 сыл чэпчэтиилээх ыстааһы олохтуур туһунан этии киллэрдилэр.
Туһааннаах сокуон барыла парламент палаататыгар көрүүгэ киирдэ. Көҕүлээччилэринэн баартыйа лиидэрэ, Дуума фракциятын баһылыга Сергей Миронов уонна Госдуума доруобуйа харыстабылыгар кэмитиэтин бэрэссэдээтэлин бастакы солбуйааччы Федот Тумусов буолаллар.
РИА-Сонуннарга Миронов кэпсээбитинэн, билигин болдьоҕун иннинэ страховой биэнсийэҕэ тыа сиригэр, куораттыы тииптээх бөһүөлэктэргэ 25 сыл, куоракка 30 сыл үлэлээбит миэдиктэр бараллар.
Миронов этэринэн, уустук балаһыанньаҕа суһал көмө үлэһиттэрэ түбэспиттэр. Кинилэр төгүрүк суукканы быһа бастайааннай ыгылыйыыга сылдьаллар, дьон олоҕун иннигэр үрдүк эппиэтинэһи сүгэллэр, ол онтон профессиональнай “умайан хаалыы” үгүстүк тахсар.
«Доруобуйа харыстабылын үлэһиттэрин сорох категориялара анал үлэ ыстааһын ааҕыыга чэпчэтиинэн туһаналлар. Холобур, Арассыыйа социальнай пуондата тыа сиригэр биир сыл үлэлээһини биир сыл үс ыйынан ааҕар. Хирургическай хайысхалаах отделениеларга, реанимация анестезиологиятыгар, паталого-анатомическай отделениеларга үлэлиир сорох категориялаах доруобуйа харыстабылын үлэһиттэригэр биир сыл үлэлээбиттэрэ биир сыл алта ыйынан ааҕыллар», — диэн бэлиэтээтэ.
Миронов өссө эппитинэн, тыа сиригэр уонна үрдэтиллибит ыстааһы биэрэр клиникалары бииргэ тутан, чэпчэтиилэри холбуохха сөп — оччотугар биир сыллаах үлэ биир сыл тоҕус ыйынан ааҕыллыаҕа. Ону таһынан, коронавирус эпидемиятын кэмигэр үлэлээбит сорох миэдиктэргэ биир үлэ күнэ икки ыстаас күнүнэн ааҕыллара.