Булт сокуона кытаатан иһэрин, аны булчуту дьиэтэ суох хаалларан эрэллэрин, ханна ким эрэ үүтээнин көтүртэрбиттэрин тустарынан кэпсэтиилэр социальнай ситимнэргэ дөрүн-дөрүн “күөдьүйэн” ылаллар.
Экология, айылҕаны туһаныы уонна ойуур хаһаайыстыбатын министиэристибэтин ойуур хаһаайыстыбатыгар департаменын салайааччытын солбуйааччы Алексей Готовцевтан дьон айманара төһө оруннааҕын туоһуласпыппар маннык быһаарда:
– Дьиҥинэн, Ойуур хаһаайыстыбатын сокуонунан маннык ирдэбил олохтоммута сүүрбэччэ сыл буолла, – диир Алексей Валентинович. – Бастатан, үүтээннээх киһи булт хаһаайыстыбалааҕын, ол эбэтэр бултааһыны тэрийэрин туһунан биһиги министиэристибэбитин кытта сөбүлэһии түһэрсибит буолуохтаах. Оччоҕуна, иккиһинэн, ойуур учаастага аукциона суох бэриллэр (РФ Ойуурун кодексын 73.1 ыст. 3-с чааһын 1-кы пууна). Ойуур учаастагар бырайыак докумуоннаах буолуохтаах (РФ Ойуурун кодексын 70.1 ыст. 1-кы чааһа). Ону “Рослесинфорг” федеральнай судаарыстыбаннай бүддьүөт тэрилтэтигэр межевание оҥорторон, кадастр нүөмэрин ылар (РФ Ойуурун кодексын 70.1 ыст. 14-с чааһа).
Ойуур сирин түүлэһии сокуонунан хааччахтанар. Өскөтүн, “Уһук Илиннээҕи гектарга” быстаран ыллаххына даҕаны, 5 сыллаах болдьох кэнниттэн ойуур сыһыаннаһыытыгар киирэҕин (119-с федеральнай сокуон 2-с ыст. 6-с чааһа), ол аата ойуур учаастагын арендаҕа ылаҕын. Бултааһыны эбэтэр иккис хайысханы талыаххын сөп. Ол – рекреация, сахалыы эттэххэ, сынньалаҥ, чөлгө түһүү. Дьон биири өйдүөх кэриҥнээх: хайа даҕаны түбэлтэтигэр ИП-лаах, ол эбэтэр урбаанньыт буолуохтааххын. Бааһынай хаһаайыстыбалаах киһиэхэ бу ордук табыгастаах, бааһынай (пиэрмэр) эбии дьарык быһыытынан ыйдаҕына, үүтээни докумуоннатара судургу буолуо.
Василий Никифоров
Сообщение Сокуон хараҕынан: булчут үүтээнин булгуччу докумуоннатыахтаах дуо? появились сначала на Улус Медиа.