Быйыл сайын билэр дьонум, бэйэм даҕаны хаста даҕаны Өлүөнэ эбэни туораан, дойдубутугар тахса сырыттыбыт. Онно көрдөххө, таксыылар баар буолан, айан-сырыы тупсубут курдук.
Өрүһүнэн үгүстэр “Сулустарынан” туоруур буолбуттар. Тоҕо диэтэххэ, кинилэр Өрүс пуордугар тохтууллар. Ол табыгастаах курдук. Киирэргэ чугас.
Оттон 203‑с түөлбэҕэ баар “Саха сирин тимир суолларын” суудуната тохтуур сиригэр 17 №-дээх оптуобус сороҕор биричээлгэ диэри тиийэр, сороҕор кыайан тиийбэт. Тоҕо диэтэххэ, массыыналар толору турунан кэбиһэллэр эбит. Онон улахан кыһыл оптуобустар кыайан эргийбэттэр. Бэл, биирдэ оптуобус хааллан, икки чаас турбут этэ.
Маны ким да улаханнык хонтуруоллаабат курдук. Дьиҥэ, тимир суолларын тырамбаайын араспысаанньатыгар сөп түбэһэн, сыана аҥаарыгар чэпчэкитик айанныыр туох куһаҕаннаах буолуоҕай? Онон таарыйа тимир суолларын салалтатыгар махтанабыт.
Ону таһаҕастаах, сорох кыра оҕолоох, кырдьаҕас дьон өр баҕайы сатыы хаамаллара эрэйдээх этэ. Куорат дьаһалтата бэртээхэй тохтобулу оҥорон туруорбут этэ, дьиҥэ.
Онон куйаас, сороҕор ардахтаах күннэргэ айанныырга син араас моһуоктардаах эбит. Ол да буоллар, “Сулустарга” үгүс киһи махтанар. Хайа уонна олохтоох уолаттарбыт өрүс суолун идэтин баһылаан иһэллэрэ хайҕаллаах, инникитин туһалаах да буолуоҕа.
С. Павлова.