Бүгүн Билим академиятын дьиэтигэр Үөһээ Бүлүү улууһун үөрэҕириитин тиһигин 150 сылыгар аналлаах «Улуус үөрэҕириитэ‑2036: кэлэр 10 сылы былааннааһын» стратегическай сиэссийэтэ үлэлээтэ.
Сиэссийэ чэрчитинэн Үөһээ Бүлүү улууһун Үөрэҕин управлениетын начаалынньыга Юрий Кынатов үөрэх тиһигин билиҥҥи туругун сиһилии ырытан кэпсээтэ.
Дакылаат сүрүн тиэмэлэринэн: улуус сайдыытын демографическай билгэлээһин; үөрэх тэрилтэлэрин ситимин туруга; үөрэх тиһигин каадырын кыаҕа; үөрэх тэрилтэлэрин материальнай-техническэй баазалара буоллулар.
— 2025-2026 үөрэх сылыгар улуус үрдүнэн уопсайа 45 үөрэх тэрилтэтэ үлэлиир: 17 орто оскуола, 6 сүрүн оскуола, 1 оскуола-саад, 14 уһуйаан, 6 эбии үөрэхтээһин тэрилтэтэ, ону таһынан өрөспүүбүлүкэтээҕи лиссиэй-интэринээт. Олор истэригэр 7 агро-оскуола, 13 кыра кэмпилиэктээх оскуола, 13 оскуола иннинээҕи үөрэхтээһин сүһүөҕэ баар. Быйылгы үөрэх сылыгар улуус 24 үөрэҕин кыһатыгар 3057 оҕо үөрэнэр, ол иһигэр алын сүһүөххэ, ол эбэтэр 1-4 кылаастарга 1203, орто сүһүөххэ – 1497 уонна 357 үөрэнээччи үрдүкү кылаастарга үөрэнэллэр. Быйылгы үөрэх сылыгар 291 уһуйаан иитиллээччитэ үөрэнээччи үрдүк аатын ыллылар. 3057 үөрэнээччиттэн 328 оҕо доруобуйаларынан хааччахтаахтар, олор истэригэр 90 инбэлиит оҕо баар. 61 оҕо дьиэтигэр олорон анал бырагырааманан үөрэнэр. Кэлиҥҥи сылларга үөрэнээччи ахсаана аҕыйыыр, холобур, 2024 сылтан 2025 сылга улуус үөрэнээччитин ахсаана 122 оҕоннон аҕыйаата. Орто оскуоланы бүтэрээччилэртэн үөрэххэ ураты сиһиилэрин уонна биир кэлим эксээмэҥҥэ үрдүк көрдөрүүлэрин иһин “За особые успехи в учении” диэн анал мэтээл 1 истиэпэнинэн Аммосова Сардаана, Г.Н. Чиряев аатынан Хоро орто оскуолатын үөрэнээччитэ, Неустроева Чөмчүүнэ, Золотарев Н.А. аатынан Боотулуу орто оскуолатын үөрэнээччитэ, М.А. Алексеев аатынан Өрөспүүбүлүкэтээҕи лиссиэй-интэринээт үөрэнээччитэ Терентьева Анита наҕараадаланнылар уонна кыһыл аттестаты туттулар. “За особые успехи в учении” мэтээл 2 истиэпэнинэн П.Н. Тобуруокап аатынан Нам орто оскуолатыттан Сутуруканова Сайаана, Н.Г. Золотарев-Якутскай аатынан Харбалаах орто оскуолатыттан Николаев Кристьян, Д.С. Спиридонов аатынан улуус гимназиятыттан Андреев Олег, Кынатова Динара, Васильева Вероника, М.А. Алексеев аатынан өрөспүүбүлүкэтээҕи лиссиэй-интэринээттэн Иванова Сайыына, Павлова Аида, Васильева Виолетта, Николаева Ангелина, Таппагарова Карина, Тимофеева Ванесса – барыта 11 выпускник наҕараадаланнылар. Ол курдук, 2025 сылга үрдүк үөрэххэ улуус муниципальнай оскуолаларыттан 31 оҕо, өрөспүүбүлүкэтээҕи лиссиэйтэн 32 оҕо, улуустан уопсайа 63 оҕо үрдүк үөрэххэ киирдилэр. Кэлиҥҥи сылларга патриотическай хайысхаҕа болҕомто күүскэ уурулунна. Ол курдук, иитэр эйгэҕэ билиҥҥи кэм ирдэбилинэн федеральнай тосхоллор чэрчилэринэн оскуолаларга оҕо-ыччат хамсааһына, оскуола тыйаатыра, түмэллэр, волонтерскай хамсааһын киинэ, успуорт кулууптар, байыаннай кулууптар о.д.а. бырайыактар, оскуола олоҕор тэтимнээхтик үлэлиилэр. Д.С. Спиридонов аатынан улуустааҕы гимназия «Сайдам» хамаандата өрөспүүбүлүкэтээҕи байыаннай-патриотическай күрэскэ «Зарница 2.0» муҥутуур кыайыылааҕа буолан Волгоград куоракка Бүтүн Арассыыйатааҕы күрэскэ баран ситиһиилээхтик кытынна. Саха сирин үөрэнээччилэрин «Спортивные якутяне» спартакиадатын саамай далааһыннаах успуорт күрэҕэр биһиги оҕолорбут хамаандалара 2 миэстэни ылары ситистилэр. Санатан эттэххэ, 2021 сыллаахха Арассыыйаҕа 2030 сылга диэри оҕо успуордун сайыннарыы Концепцията уонна ол олоххо киириитин тэрээһиннэрин былаана ылыллыбыта. Өрөспүүбүлүкэ Ил Дархана Айсен Николаев бырабыыталыстыбаҕа эрэгийиэннээҕи бырагырааманы толкуйдуурга уонна олоххо киллэрэргэ соруйбута. 2025 сылга Бүтүн Арассыыйатааҕы конференцияларга кыттыбыт 51 үөрэнээччиттэн 31 кыайыылаах уонна призер буолбута.