Алтынньы 13 күнүгэр Дьокуускайга саҥа тутуллубут 1-кы №-дээх оскуолаҕа куорат дьаһалтатын үлэһиттэрэ төрөппүтэри кытта көрүстүлэр. Бу туһунан «Эхо столицы» хаһыат суруйар.
Көрсүһүүгэ куорат аҕа баһылыгын социальнай боппуруостарга солбуйааччы Ольга Яшина, үөрэх управлениетын начаалынньыга Андрей Новоприезжай уонна кини солбуйааччыта Айан Иванов ыйытыыларга хоруйдаатылар.
Саҥа дьиэ Дьокуускай маастар-былаанын чэрчитинэн тутуллубут. Атырдьах ыйын 26 күнүгэр «Жилнадзор» управлениета дьиэни үлэҕэ киллэрэргэ көҥүлү биэрбитэ. Атырдьах ыйын 27 күнүгэр куорат дьаһалтата уонна СӨ судаарыстыбаннай сакаасчытын сулууспата дуогабарга баттаһан, эбийиэк өрөспүүбүлүкэ дьаһалыттан мэрия балансатыгар көспүтэ.
Балаҕан ыйын 9 күнүгэр Гигиена, эпидемиология киинэ санитарнай ирдэбиллэри кэһиигэ 15 бэлиэтээһини оҥорбута. Онтон куорат борокуратуурата бэрэбиэркэлээн, бу ирдэбиллэри уонна эбии ититии киирэ илигин бэлиэтээбитэ.
Ол кэнниттэн кэһиилэри туоратыыга үлэ баран, 15 ыйыыттан 14-дэ туоратылынна. Ол курдук, юридическэй сирэйи кытта быстах көрүү-истии дуогабара оҥоһулла илик. Бу боппуруос билигин да быһаарылла илик.
Маны тэҥэ, таһырдьа күрүө суоҕа ыйыллыбыт.
Бастакы бырайыагынан, күрүө эрдэттэн көрүллүбэтэх этэ, тоҕо диэтэр, куорат киинин көстүүтүгэр, архитектуратыгар мэһэйдиир. Ол эрээри мэрия төрөппүт кэмитиэтин кытта оробуочай бөлөҕү тэрийэн, күрүө оҥорорго, 14 мөлүйүөн солкуобайы көрөргө бэлэм.
Маны тэҥэ, уолаттар мастарыскыайдарыгар салгылатар систиэмэ (вентиляция) суох. Куукунаҕа 7 иһит сууйар сир оннугар 5 эрэ баар. Маны мэрия туоратарга бэлэм. Уолаттар туалеттарыгар писсуардар быыстара суох эбит, ону туруорбуттар.
Информатика кэбиниэтигэр көмпүүтэрдэр тура иликтэрэ. Көмпүүтэрдэр, дьиҥэ, бааллар, атыын кэбиниэккэ хараллан сыталлар.
Таһырдьа спортивнай былаһаакка бүрүөһүнүн докумуоннара, сэртипикээттэрэ суохтар. Докумуон баар буолбут. Душ хоһун иэнэ 12 кв.м. кыра диэн эмиэ иҥнибиттэр. Дьиҥэ, саҥа бырайыагынан, душ хоһун иэнэ 12,28 кв.м. эбит. Сорох кэбиниэттэр ыйынньыктара сыыһа тураллар. Ону көннөрбүттэр.
Ититии алтынньы 9 күнүгэр киирбит.
Онон быстах көрүү-истии дуогабарын түһэрсии хаалбыт, оччоҕо «Роспотребнадзор» иккис бэрэбиэркэтин ыытыан сөп. Барыллааһын быһыытынан, иккис чиэппэр саҥатыттан оскуола үөрэнээччилэригэр аанын тэлэччи арыйыан сөп.
