Билигин атыыланар бородуукталарга араас элбэх эбиликтээх буолан, кэлин болҕомто да уурбат курдукпут. Оттон тугу сиирбит барыта доруобуйабытыгар улаханнык дьайар. Буортулаах аһылыктар, майонезтар, кетчуптар туһунан суруйабыт эрээри, син биир аһылыкка туттубуппут эрэ баар буолар. Оччотугар үчүгэй кетчубу хайдах талабыт?
Дьиҥнээх томаттан оҥоһуллубут кетчуп састааба аҕыйах буолар. Томатнай пааста, туус, тума уонна уу. Онтон атына барыта ас амтанын тупсарар эбиликтэр буолаллар. Кетчуп хаатыгар бородуукта категорията суруллар. «Экстра» — классическай састаапка чугас, аҕыйах эбиликтээх буолар. Үрдүк, бастакы, иккис категориялаах диэн суруллубут буоллаҕына, хойуннарар эбиликтээх, консерваннаах (сорбиновай, бензойнай кислоталаах буолар), амтан тупсарардаах, саахары солбуйардаах.
ГОСТ эбэтэр ТУ?
Кетчуп хаатыгар ГОСТ диэн суруктаах буоллаҕына, кетчуп ырысыаба уонна састааба хонтуруолланар. ТУ — (тиэхиньиичэскэй усулуобуйата) докумуона суох, састааба ситэ биллибэт буолар. Ордук амтан тупсарар стабилизатордар, кырааска эбиллибит буолуон сөп. Онон атыылаһар кетчуп хаатыгар «ГОСТ» уонна «»Экстра» диэн суруктаах буоллаҕына, куттаммакка атыылаһыҥ.