Анаабырга Үрүҥ Хайа дэриэбинэтигэр күн тохсунньу ортотугар күөрэйэн тахсар. Оҕолорго үөрүү-көтүү, күнү уруйдааһын, күн тахсар бырааһынньыга буолар.
Ийэлэр, эбээлэр иистэнэн, кыргыттар оҕуруолаан, уолаттар маһынан уһанан, дьиэлэргэ оһуор ойуу оҥороллор. Арктикатааҕы “Хэйро” этно-култуурунай кииҥҥэ иистэнньэҥ идэлээх Вера Михайловна Кылтасова оҕолору үөрэтэ сылдьарыгар түбэһэн кэпсэттим. Уһуйаан оҕолоругар “Волшебная изонить”, оскуола оҕолоругар “Боскуой кыыс”, “Точечная роспись” диэн ааттаах куруһуоктары оҕолорго үөрэтэр. Уопсайа түөрт уонча оҕо дьарыктанар эбит. Арассыыйатааҕы, өрөспүүбүлүкэтээҕи, улуустааҕы куонкурустарга кыттан, кэккэ ситиһиилэрдээхтэр. Кыайыы 80 сылыгар анаан, ийэлэр, кыргыттар бэйэлэрин дьоннорун, эбэлэрин-эһэлэрин быысапканан тигэн панно оҥорбуттар.
”Боскуой” куруһуок оҕолоро апликациянан тигэн кыттыспыттар. Вера Михайловна нэһилиэк уопсастыбаннай үлэтигэр көхтөөхтүк кыттар. 2022 сыллаахха байыаннай дьайыы саҕаланаатын кытта аан бастакы көмөлөрүн — харысхаллары оҥорон ыыппыттар. М. Н.Туприна таба тириититтэн сарыы биэрэн, сарыы мөһөөччүктэри тигэн, онно сэппэрээги, кытыан оту, сомдуркурааны (хоту үүнэр кылгас уктаах от) угпуттар. Мөһөөччүк кэннигэр “Айыыларбыт арчылаан” диэн быысапкалаан, учуутал Надежда Прокопьевнаҕа алҕатан, уруунанан сурук суруйан отут алта устуука харысхалы уонна Дмитрий Михайлович мунха илимин биэрэн, элбэх харыстанар сиэккэни баайан ыыппыттар. Кыһыл кэлгиэлэри, бырыһыан таҥастан саа уоһугар чохуоллары, тирииттэн матараастары тигэн биэрбиттэр. Ааспыт ыйга үс сиэккэ, кэриэрдии бурдук, бааркы, бичиэнньэ арааһа, Лидия Прокопьевна хатарбата, 53 бакыат бааркы (балыгы уҥуоҕуттан арааран буһарыы), 47 бааркы ас вакуумнаан тиэрдиллибит. Биир куул бурдугу, биир дьааһык сгущенканы урбаанньыт Варвара Н.Г., вакуум-аппарааттары Туприна П.Н, Акакьева Анастасия биэрбиттэр.
”Боскуой” куруһуок кыргыттара 10 устуука үрүҥ эһэни ойуулаан тигэн, уруһуйдары уган ыыппыттар. Бу көмө барыта ийэлэр, эдьиийдэр көмөлөрүнэн оҥоһуллубут. Нелли Ивановна Туприна кэлгиэни тигэн, бааркы, халаачык астаан аҕалбыт. Олохтоохтор сибиэһэй балыгы Саскыылахха ыытан, “МУП Андросова” тэрилтэ ону ыыһаан, байыаннай дьайыы байыастарыгар тириэрдибиттэр. Дойдуларын аһа ыраах сылдьар уолаттарга күндү буоллаҕа.
“Кыа кыымнара” литературнай түмсүү кыттыылааҕа Вера Михайловна “Анаабырбыт биһиэнэ”, “Айан суола биһиэхэ”, ”Үрүн Хайам”, о.д.а. бэртээхэй хоһооннору суруйда. Кини Дьокуускайга үөрэнэн, ВИЕДА хампаанньа аппараатынан дьону массаажтыыр. Вера Михайловна төрөппүттэрэ сэттэ оҕону төрөтөн, элбэх оҕолоох, туруу үлэһит дьон этилэр. Вера кэргэнэ Эдуард Афанасьевичтыын (зоотехник идэлээх) Эбэ кытыытыгар дьиэ туттан олороллор. Улахан кыыстара Любовь Өрөспүүбүлүкэтээҕи 2 №-дээх балыыһаҕа кардиологунан, кыра кыыс Айталина Перинатальнай кииҥҥэ сиэстэрэнэн, Михаил “Анаабыр алмаастара” үлэлииллэр. Кэргэнэ Кылтасова Т.Н Мииринэй Таас үрэҕиттэн, күтүөттэр: Григорьев А.А — Нерюнгриттан, Седалищев В.Е. Чурапчыттан төрүттээхтэр, дьоһун-мааны үлэһит дьон. Вера Михайловна үлэтин сыаналааннар, Анаабыр Үрүн Хайа нэһилиэгэ тэриллибитэ 85 сылынан “Хотугу сиргэ өҥөтүн иһин” мэтээлинэн, Үрүн Хайа дьаһалтата түөскэ анньыллар бэлиэнэн наҕараадалаата.
Галина БОРИСОВА-ТОЛБООНО, Дьокуускай
