Норуоттар доҕордоһууларын дьиэтигэр «Эвэды турэн» эбэҥки тылын күнэ ураты истиҥник буолла.
Эбэҥкилэр ассоциациялара тэрийбит тэрээһинэ уон биирис төгүлүн үрдүк тэрээһиннээхтик ыытылынна. Түһүлгэҕэ түмсүбүт ыалдьыттары Анастасия Куличкина салайааччылаах «Гиркилэн» фольклор ансаамбылын бөлөҕүн иитиллээччилэрэ «Дялер» диэн дууһаны манньытар, сүрэҕи үөрдэр ураты кэрэ үҥкүүнэн эҕэрдэлээтилэр. Бу үҥкүүнэн үгэс эдэр көлүөнэҕэ бэриллэн иһэрин көрдөрдүлэр.
Үөрүүлээх күн сүрүн түгэнинэн эбэҥки тылыгар үөрэтэр-методическай босуобуйалары билиһиннэрии буолла. Бу СӨ тас сибээскэ уонна норуоттар дьыалаларын министиэристибэ, А.Е.Кулаковскай аатынан норуоттар доҕордоһууларын дьиэтин үбүлээһиннэринэн тахсыбыт босуобуйалар учууталларга уонна эбэҥки тылын билэргэ-көрөргө, үөрэтэргэ, харыстыырга дьулуһар дьоҥҥо барыларыгар улахан бэлэҕинэн буолар. Босуобуйалар: «Эвенкийская азбука», «Эвенкийские ребусы», «Изучаем именные части речи эвенкийского языка», «Эвенкийско-русский русско-эвенкийский словарь: учебное пособие для общеобразовательных организаций».
Филология наукатын кандидата, РНА СО Гуманитарнай чинчийии уонна хотугу аҕыйах ахсааннаах омуктар кыһалҕаларын үөрэтэр институтун наукаҕа үлэһитэ Мария Дьяконова үөрэтэр-методическай босуобуйалар СӨ судаарыстыбаннай уонна официальнай тылларын харыстааһыҥҥа судаарыстыбаннай тус сыаллаах бырагыраама чэрчитинэн тахсыбыттарын тоһоҕолоон бэлиэтээтэ. Үп-харчы Нерюнгри оройуонун Иенгра оскуолатын учууталлара бэлэмнээбит босуобуйаларын таһаарарга анаммыт.
А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Корякина:
—Бүгүн биһиги Саха сиригэр эрэ буолбакка, Уһук Илин эрэгийиэннэригэр олорор эбэҥки норуотун бүтүннүүтүгэр сыһыаннаах улахан үлэни көрөбүт. Бу эбээн норуотун култууратын, тылын-өһүн тарҕатар босуобуйалар бибилэтиэкэлэргэ хайаатар да биир сүрүн миэстэни ылыахтара дии саныыбын, — диэн Антонида Николаевна санаатын үллэһиннэ.
Бу күүтүүлээх тэрээһин Дьокуускай таһыгар тиийэ дуорайда. Онлайн-сибээһинэн Нерюнгри оройуонун Иенгра сэлиэнньэтиттэн Г.М.Василевич аатынан орто уопсай үөрэхтээһин оскуола-интэринээтиттэн, ону сэргэ бу таһаарыылар рецензеннэрэ Улан-Удэттэн уонна Санкт-Петербуртан кытыннылар.
Эбэҥкилэр ассоциациялара төрөөбүт тыл дэкээдэтин иитинэн үөрэтэр босуобуйалар биһирэмнэрин Опера уонна балет тыйаатырыгар, 38 №-дээх оскуолаҕа эбэҥки норуотун айымньытын бэстибээлигэр ыыттылар. Ону таһынан эбэҥки суруйааччыта Галина Кэптукэ төрөөбүтэ 75 сылыгар анаан «Гунилгэн хоктолин» диэн литература куонкуруһа иккис төгүлүн ыытыллара былааннанар.
А.Е.Кулаковскай аатынан норуоттар доҕордоһууларын дьиэтин пресс-сулууспата
Хаартыскалар: А.Е.Кулаковскай аатынан норуоттар доҕордоһууларын дьиэтин пресс-сулууспатыттаа