Олунньу 22 күнүгэр өрөбүллээҕи Оһуокайбыт Аҕа дойдуну көмүскээччилэр күннэригэр ананна.
Оһуокайбыт күнэ «Чараҥ» вокальнай ырыа ансаамбылын эҕэрдэ ырыатынан саҕаланна. «Чараҥ» вокальнай ырыа ансаамбыла «Оһуокай» түмсүү иһинэн тэриллибитэ ыраатта. Араас ырыа күрэхтэригэр көхтөөхтүк кыттар, куоракка биир биллэр ансаамбыл буолар.
Оһуокайы Дархан этээччилэр Валентин Хорунов, Марта Николаева, үтүөлээх этээччилэр Каджана Евсеева, Светлана Сивцева о.д.а эттилэр. «Оһуокай» түмсүү ырыаһыттара Розалия Гуляева, Людмила Окс, Ким Кузьмин, Евгения Игнатьева о.д.а. ылбаҕай ырыаларынан эҕэрдэлээтилэр.
Үтүөлээх этээччи Данил Пестряков спортивнай күрэхтэри тэрийэн ыытта. Дьөлөҕөс иһигэр табан быраҕыы күрэҕэр эр дьоҥҥо Юрий Корнилов, Аскалон Егоров, дьахталларга Маргарита Данилова бастаатылар. Үс миэстэҕэ тиксибит кыайыылаахтар бары «Оһуокай» түмсүү бирииһинэн наҕараадаланнылар.
Оһуокай мэлдьи да буоларын курдук көхтөөхтүк, элбэх дьону хапта. Эйэлээх халлааны алгыстаан Оһуокай куйаарга дуорайда. Кэлэр өрөбүлгэ Амма Оһуокайа буолуоҕа.
Марта Николаева