Тэрээһиммит Кыайыы боллуоссатыгар, Ильмень пааматынньыгар, Сэмэн Дьячковскай искибиэригэр уонна Александр Парфенов мемориалыгар сибэкки дьөрбөтүн уурууттан саҕаланна.
Ыччат ааҕыныстыбата уонна А.Н.Осипов, С.П.Данилов, В.В.Филиппов ааттарын сүгэр үс оскуолабыт тэрийэн ыыттылар. Байыаннай дьайыы бэтэрээннэрэ, оскуола оҕолоро түөрт сиринэн арахсан тэрээһиҥҥэ көхтөөхтүк кытыннылар. Сэрии хонуутугар тыыннарын толук биэрбит дьоммутун ахтан-санаан аастыбыт.
Бэтэрээннэр түмэл-дьиэлэригэр Бэрдьигэстээхтээҕи кыраайы үөрэтэр түмэл үлэһиттэрэ «Билиҥҥи кэм геройдара» интерактивнай быыстапка оҥорбуттарын көрдөрдүлэр. Аныгы үйэ экраныгар киирэн араас кэминээҕи быстах дьайыылар кыттыылаахтарын хаартыскаларын, уолаттар тустарынан киирэн көрүөххэ сөп.
Мэхээлэ Дьөгүөрэп аатынан сынньалаҥ киинигэр «Модун санаа, ытык иэс» диэн тэрээһин ыытылынна. Сүрүн кыттыылаахтарынан байыаннай дьайыы бэтэрээннэрэ, кинилэр дьиэ кэргэттэрэ буоллулар. Билиҥҥи уустук кэмҥэ ыраастаныы, арчыланыы улахан суолталаах. Алгыс сиэрин-туомун Саха сирин «Итэҕэл сүбэтэ» түмсүү бэрэссэдээтэлин солбуйааччыта Алгыстаан Дуруһаал толордо. Билигин Аҕа дойдуларын көмүскүү сылдьар уолаттарбыт этэҥҥэ төннөн кэлэллэригэр алгыспытын анаатыбыт.
Тэрээһиммит ыалдьыттара: СӨ «Аҕа дойдубут туһугар» бойобуой дьайыы бэтэрээннэрин түмсүүтүн салайааччыта, «Боотур» баҕа өттүнэн сылдьар этэрээт салайааччыта Иван Черкашин, Арассыыйа Федерациятын сенаторын көмөлөһөөччүтэ, СӨ экология министиэристибэтин Сэбиэтин бэрэссэдээтэлин бастакы солбуйааччы Игорь Бястинов, СӨ адаптивнай физическэй култууратын уонна успуордун киинин дириэктэрэ Ньургун Иванов, “Саха сирэ – Дьоруойдар Дойдулара” бырагыраама курсаннара Михаил Копырин уонна Октябрина Афанасьева.
Аҕа Дойдуну көмүскээччилэрин күннэринэн улууспут баһылыга Никита Андреев, нэһилиэк баһылыга Алексей Аргунов, байыаннай комиссар Алексей Бадлуев уонна ыалдьыппыт Иван Черкашин эҕэрдэлээтилэр, уолаттарга бойобуой мэтээллэри, махтал суруктары, саллааттар төрөппүттэригэр “Аҕа дойдуну көмүскээччи Ийэтэ”, “Саллаат аҕата” мэтээллэри дохсун ытыс тыаһыгар арыаллатан туттардылар. Бүгүҥҥү кэм дьоруойдарын үүнэр көлүөнэбит эҕэрдэлээтэ, «Кэнчээри» уһуйаан оҕолоро ырыа ыллаатылар (сал.В.Никулина), гимназия «Төлөн» куруһуогун оҕолоро хоһоон аахтылар (сал.Н.Парфенова).
Үгэс быһыытынан ыытыллар «Барыта кыайыы туһугар» диэн аһымал марафон буолла. Олунньу ый 24 күнүгэр улууспут баһылыга Никита Андреев, Бэрдьигэстээх нэһилиэгин баһылыга Алексей Аргунов уонна Одуну нэһилиэгин баһылыга Владимир Текеянов байыаннай дьайыыга сылдьар уолаттарбытын кытта көрсө бараллар. Кинилэргэ наадыйар малларын атыылаһарга төһүү күүс буолар аахсыйаҕа тэрилтэлэрбит, түөлбэлэрбит, биир дойдулаахтарбыт, биирдиилээн дьон турунан, көхтөөхтүк кытыннылар. Кировскай уонн Солоҕон нэһилиэгин олохтоохторо харчы хомуйан ыыттылар. Түөлбэлэрбит ас хомуйан дьаарбаҥкаҕа атыылаатылар. Уопсайа 798 300 солк киирдэ.
Күн иккис аҥарыгар байыаннай дьайыы кыттыылаахтарын, кинилэр дьиэ кэргэттэрин кытта көрсүһүү тэрилиннэ. Манна ыҥырыылаах ыалдьыттарбыт бэйэлэрин хайысхаларынан үлэлэрин кэпсээтилэр, араас сүбэ-ама биэрдилэр. Аһаҕас кэпсэтиини нэһилиэк баһылыга Алексей Аргунов иилээн-саҕалаан ыытта. Бэтэрээннэрбит бэйэлэрин санааларын үллэһиннилэр, ирэ-хоро кэпсэтииттэн бары да астынныбыт. Бүгүҥҥү күммүт уолаттарбыт буулдьанан ытыыга күрэхтэһиилэринэн түмүктэннэ.
Бу тэрээһиммитигэр кыттыспыт дьоммутугар нэһилиэк дьаһалтатын аатыттан улахан махталбытын биллэрэбит.
Ксения Васильева,
Бэрдьигэстээх нэһилиэгин баһылыгын солбуйааччыта,
Горнай.
Хаартыскалар Ксения Васильева тиксэриилэрэ