Бу күннэргэ Тулагы-Киллэмҥэ «Родник» култуура дьиэтигэр өтөрүнэн буолбатах ураты тэрээһин буолла.
Бу соҕотох сылдьар дьоҥҥо анаммыт тэрээһин үрдүк таһымнаахтык уонна ис сүрэхтэн истиҥник ыытылынна. Маннык хабааннаах сынньалаҥ тэрээһиннэр буолбатахтара, кырдьыга, балачча ыраатта.
Онуоха олохпутугар социальнай ситимнэр күүскэ киириэхтэриттэн сорохтор аралдьыйаллара, бириэмэлэрин атаараллара төлөпүөннэрэ эрэ диэтэхпитинэ, улаханнык сыыстарыахпыт суоҕа дис саныыбын. Дьиҥэр, үксүбүт сүргэни көтөҕөр көрсүһүүлэргэ, истиҥ кэпсэтиилэргэ, ырыа-үҥкүү доҕуһуоллаах түмсүүлэргэ олус талаһар эбээт! Кэтэһэр. Ол дьиҥ туоһутун Тулагы-Киллэмҥэ ыытыллыбыт сынньалаҥ тэрээһинэ бигэргэттэ диэххэ наада.
Дьиҥэр, Киллэм олус улахана суох. Аҕыйах киһилээх нэһилиэк да буоллар, дьоно-сэргэтэ сэргэхтик олороллор. Култуура дьиэтин үлэһиттэрэ манна биллэр-көстөр сабыдыаллаахтарын биһиги көрөн итэҕэйдибит.
Тэрээһиҥҥэ үлэһиттэр олохтоохтук оҥостубуттара, кыһамньыларын уурбуттара тута биллэр. Ол курдук, култуура дьоҕус дьиэтин ис өттө киһи кута-сүрэ тохтуур гына тупсаҕайдык оҥоһуллубута, сиэдэрэйдик киэргэтиллибитэ, дьэҥкир таас иһиттэрдээх, ваазаларга туруоруллубут тэтэркэй сибэккилэрдээх, ресторан остуолуттан итэҕэһэ суох сандалы биһигини олус сөхтөрдө, сүргэбитин көтөхтө. Үлэһиттэр ыалдьыттары сырдыгынан сыдьаайа сылдьар мичээрдэринэн, истиҥ тылларынан эҕэрдэлээн эйэҕэстик көрүстүлэр.
Тэрээһин идэтин чахчы баһылаабыт Светла Попова итиэннэ Вера Дягилева диэн эдэр үлэһит иилээн-саҕалаан, көргө-нарга көҕүлээн үрдүк таһымнаахтык ыыттылар. Хас да ырыаны бэйэлэрэ толордулар. Мустубут дьоҥҥо, остуолга олорооччуларга анаан биирдиилээн уонна хамаанданан оонньуулары олус үчүгэйдик тэрийдилэр. Көхтөөхтүк кыттыбыттар ыытааччылартан бэлэхтэри тутан үөрдүлэр-көттүлэр. Дьоро киэһэҕэ Хаҥаластан сылдьар Бүөтүр уонна Намтан кэлбит Күннэй ырыаһыт дьоҕурдаахтарын сэргээтибит. Биһиги Бүөтүр «Муомаҕа» диэн ырыаны толорорун мэлдьи истэр эбит буоллахпытына, бу сырыыга киһибит «Самоцветы» ВИА «Листья желтые» ырыатын ыллаан киэҥ сэҥээриини ылыан ылла. Күннэй хатыламмат кэрэ куолаһынан сахалыы ырыалары олус үчүгэйдик толордо. Онон иккиэн дохсун ытыс тыаһынан арыалланнылар. Сэбиэскэй кэмнээҕи ырыаларынан, музыканан дуоһуйа үҥкүүлээтибит, вальстаан эргичийбэхтээн ыллыбыт. Музыканы, ырыаны туруорааччы, хореограф уол Илья Крылов үҥкүү хамсаныыларыгар үөрэтиитэ бу дьоро киэһэ сонун көстүүтүнэн буолла, болҕомтону тарта. Мин санаабар, кыһаллан-мүһэллэн син үтүгүннүбүт, майгыннаттыбыт быһыылаах дуу…
Түөрт истиэнэҕэ хаайтаран олорбут дьон итиннэ тиийэн оонньоон-көрүлээн, ыллаан-туойан, истиҥник сэлэһэн, бүтэн биэрбэт түбүктэртэн аралдьыйан олус да сэргэхсийдибит, астына-дуоһуйа сынньанныбыт.
Бу тэрээһин ыытылларыгар түбүгүрбүттэргэ, Тулагы-Киллэм нэһилиэгин култууратын дьиэтин бары үлэһиттэригэр, биһигини көҕүлээбит, ыҥырбыт Дарияҕа, Настяҕа умнуллубат кэрэ түгэннэри бэлэхтээбиттэригэр махталбытын тиэрдэбит. Сандалы остуолбут хотойорунан дэлэгэйдик ас астаан аҕалбыт кэрэ аҥардарбытыгар биһиги махтал истиҥ тылларын аныыбыт. Хаҥаластан ырааҕын аахсыбакка, уһун айаны айаннаан кэлэннэр Бүөтүр ырыатынан, Ньукулай үҥкүүтүнэн уйдаран, Лев маһынан оҥоһуктарын хаартыскаларын көрдөрөннөр мустубут дьону наһаа сэргэхситтилэр, санааларын көтөхтүлэр. Киллэмҥэ илдьибит, аҕалбыт сымнаҕас олбохтоох, сыыдам сырыылаах тимир көлөлөөхтөргө Ньукулайга, Аркадийга, Никитаҕа, Геннадийга махтанабыт. Маннык бары көхтөөх буолуоҕуҥ. Тэрээһин сыалын-соругун ситтэ диэн биһиги бигэ эрэллээхпит. Тэрийээччилэр ыҥырыыларын ылынабыт. Өссө тиийиэхпит диэн эрэннэрэбит. Аныгыскы көрсүһүүлэргэ диэри!
Михаил Сидоров
«Айыыһыт» кулууп, «Истиҥ сыһыан» бөлөх.