Саха сиригэр көхтөөх уһун үйэлэниини өйүүр улахан марафон саҕаланна.
Тэрээһин иитинэн мэдиссиинэ үлэһиттэрин сүбэтэ-амата, туһалаах маастар-кылаастар ыытыллаллар.
Балаҕан ыйын 12-13 күннэригэр өрөспүүбүлүкэҕэ киэҥ далааһыннаах тэрээһиннэр ыытыллаллар. Көхтөөх уһун үйэлэниини өйүүргэ уонна аҕа көлүөнэ доруобуйатын бөҕөргөтөргө туһуланар тэрээһиннэр кэрэхсэнэллэр. Хаамыы марафона аҕам саастаахтар күннэригэр, Арассыыйа Норуоттарын сомоҕолоһууларын сылыгар уонна өрөспүүбүлүкэҕэ Култуура сылыгар, Дьокуускайга Куорат күнүгэр ананар.
Саастаах дьоҥҥо маннык хаамыы күнэ балаҕан ыйын 12 күнүгэр бары улуустарга ыытыллар. Дьокуускайга култуура уонна сынньалаҥ пааркатыгар хаамыыга 55-тэн тахса саастаах дьахталлар уонна 60-тан тахса саастаах эр дьон 1-2 км хаамары талбыттар. Тэрээһиннэрэ саҕаланыан иннинэ кыттааччыларга барыларыгар хайдах хаамарга үөрэтэн маастар-кылаас ыытыллыбыт. Кыттааччылар бары «Победа» социальнай көмүскэл кииниттэн өйдөбүнньүк мэтээллэри уонна сэртипикээттэри туталлар. Онтон саамай саастаах спортсменнар үһүс саастаах оскуолатыттан анал бириистэри ылаллар.
—Бүгүн бу бэртээхэй тэрээһиҥҥэ кыттарга быһаарынным. Тулагыга олоробун, Дьокуускайга үлэлиибин. 1 км дистанцияны туораатыбыт. Иллэҥ кэммитигэр кэргэммин Владимир Иннокентьевиһы кытта куруук хаамабыт. Бу сүрэххэ, доруобуйаҕа үчүгэй, туһалаах, сэргэхсийэҕин. Онон дьоҥҥо-сэргэҕэ хамсаналларыгар, көхтөөх олоҕу талалларыгар сүбэлиибин, — диэн Наталья Васильева санаатын үллэстэр.
Сарсын, балаҕан ыйын 13 күнүгэр, Дьокуускайга Орджоникидзе болуоссатыгар «Якутия за активное долголетие» өрөспүүбүлүкэтээҕи бэстибээл ыытыллыаҕа. Ыалдьыттарга анаан быраастар сүбэлэрэ-амалара, «Школы ухода» үлэтин билиһиннэрии, «Незабудка» өйдүүр дьоҕуру сайыннарарга үлэлэһэр кэбиниэт уо.д.а. ыытыллыахтара. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/62945