Бүгүн Өксөкүлээх аатынан Норуоттар доҕордоһууларын дьиэтигэр 16-с төгүлүн ыытыллар “Якутия мастеровая» быыстапка-дьаарбаҥка бэйэтин үлэтин саҕалаата.
Өрөспүүбүлүкэ 25 улууһуттан 600 мас уонна тимир уустара, иистэнньэҥнэр, кылынан уонна сиэлинэн оҥоһуктары, куукулалары уо.д.а оҥоһуктары оҥорор дьон кэлэн кыттыыны ыла сылдьаллар.
Кэлиҥҥи сылларга Саха сиригэр үгэс буолбут култуураны, норуот уус-уран оҥоһугун өйүүргэ далааһыннаах үлэ ыытыллар. 325 киһи норуот уустарын, 781 киһи норуот уус-уран оҥоһуктар маастардарын ааттарын сүгэллэр. Тимир уустарыгар, норуот маастардарыгар, култуура үйэлээх баайын саҥалыы тыыннаабыт олоҥхоһуттарга анал истипиэндьийэлэр олохтоммуттара. Норуот уус-уран оҥоһуктарын судаарыстыбаттан өйөөһүн тосхоло ситиһиилээхтик олоххо киирдэ. Суолталаах тэрээһиҥҥэ СӨ бырабыыталыстыбатын бэрэссэдээтэлин солбуйааччы Сергей Местников сырытта.
— Бүгүн Өксөкүүлээх аатынан норуоттар доҕордоһууларын дьиэтигэр саха уус-уран оҥоһуктарын оҥорор дьон толору мустубуттар. Бары хоско барытыгар быыстапка, төгүрүк остуол, куонкурус буола турар. Мин уус-уран оҥоһуктары оҥорор ыччат дьону көрсөн кэпсэттим. Биһиги өбүгэ саҕаттан кэлбит норуот уус-уран оҥоһуктарын кэлэр көлүөнэлэргэ тиэрдэр сорукпут олоххо киирэн эрэриттэн киһи үөрэр, — диэн бэлиэтээтэ Сергей Местников.
Кырдьык, кэлиҥҥи сылларга норуот уус-уран оҥоһуктарын араас хайысхаларынан дьарыктанар дьон ахсаана элбээн, Өксөкүлээх Өлөксөй аатынан Норуоттар доҕордоһууларын бары саалаларыгар миэстэ тиийбэт курдук буолан эрэрэ харахха быраҕыллар. Араас сонун сүүрээн олоххо киирбит, маастар ахсаана да элбээбит.
Быыстапка-дьаарбаҥка кулун тутар 4 күнүттэн 6 күнүгэр диэри ыытыллар. Онон сарсыҥҥыттан өрөспүүбүлүкэ маастардарын уус-уран оҥоһуктарын тиийэн көрүҥ, кэрэхсээҥ.