Кулун тутар 8 күнүгэр анаан түөкүттэр кутталлаах аккырыыккалары тарҕатан бардылар, сигэнэн (ссылканан) киирдэххэ киһи дааннайдарын хомуйар фишинговай саайка киллэрэр эбэтэр кутталлаах бырагырааманы хачайдатан саҕалыыр. Бу туһунан РИА Новости Норуот фронын «Мошеловка» платформатын пресс-сулууспата иһитиннэрдэ.
«Мессенджердэргэ уонна социальнай ситимнэргэ «муусукалаах кэрэ аккырыыккаларга» эбэтэр «интерактивнай эҕэрдэлэргэ» кистэлэҥ сигэлэр тарҕаналлар. Сигэнэн киирдэххэ, киһи дааннайдарын хомуйар саайка киирэр эбэтэр кутталлаах бырагырааманы хачайдаан барар», — диэн эппиттэр. Ону таһынан, бырааһынньык иннинээҕи түбүккэ олоҕуран, түөкүттэр сымыйанан сибэкки тиэрдиигэ (доставкаҕа) схеманы туһанан бардылар.
«Эр дьоҥҥо «курьердартан» «ураты (эксклюзивнай) дьөрбө» иһин төлөбүрү эбэтэр «тиэрдии» иһин физическэй сирэй каартатыгар харчыны ыытарга ирдэбиллээх смс-тар эбэтэр эрийиилэр кэлэллэр. Эбэтэр дьахталларга «кистэлэҥ сүгүрүйээччи» туһунан суруйаллар уонна «тиэрдиллибитин бигэргэтэргэ» смс-коду ирдииллэр», — диэн пресс-сулууспаҕа чуолкайдаатылар.
Өссө биир тарҕаммыт албын схеманан сибэкки дьөрбөтүн оонньотор сымыйа куонкурустар баар буоллулар. Социальнай ситимнэргэ биллэр флористика устуудьуйаларын аатыттан сымыйа аккаунт оҥороллор уонна сыаналаах бириистээх «репост куонкурсу» биллэрэллэр. Бирииһи (холобур, сыллааҕы сибэкки саппааһын) ыларга «кыра харчыны» эбэтэр кыайыыны «тиэрдии» иһин төлүүргэ көрдөһөллөр диэн иһитиннэриигэ этиллэр. Маннык схемалар бэлэх көрдүүр эр дьоҥҥо, эҕэрдэ кэтэһэр дьахталларга уонна социальнай ситим көхтөөх туһанааччыларыгар туһуланаллар. Билигин схемалар ордук кутталлаахтар, тоҕо диэтэххэ куһаҕан санаалаах дьон эр дьон кулун тутар 8 күнүгэр үчүгэй бэлэҕи оҥорор баҕаларын, оттон дьахталлар үчүгэй бэлэҕи тутар баҕаларын туһаналлар.
«Мошеловкаҕа» бэлэхтэри эрэннэрэр сигэлэргэ киирбэккитигэр, оттон араас куонкурустар туһунан иһитиннэриини хампаанньалар официальнай сирэйдэригэр бэрэбиэркэлииргитигэр сүбэлээтилэр. «Өйдөөҥ, курьер хаһан даҕаны доставка иһин харчыны эрдэ каартаҕа ыытарга көрдөспөт», — диэн түмүктээтилэр.