«Далбар Хотун» өрөспүүбүлүкэтээҕи 15-с төгүл ыытыллар күрэскэ бүгүн өрөспүүбүлүкэ араас улууһуттан кэлэн, 7 кыттааччы бэйэтин билиһиннэрдэ, талба талаанынан сөхтөрдө.
Күрэс 4 түһүмэхтэн турда: бэйэни билиһиннэрии, талааны көрдөрүү, минньигэс астарынан күндүлээһин, киэһээҥҥи былааччыйанан тахсыы.
Талааны көрдөрүү түһүмэххэ Далбар хотуттар ыллыылларын, үҥкүүлүүллэрин сэргэ, бэйэлэрэ тикпит таҥастарын, сылгы сиэлиттэн оҥоһуктарын уо.д. а. көрдөрөн, күүстээх ытыс тыаһын биллилэр.
Түһүмэхтэр быыстарыгар саха эстрадатын ырыаһыттара эҕэрдэлээтилэр, талааннаах модельердар дефилелэрэ буолла.
Дайаана Ли таҥастарын кыттааччылар кэтэн сыанаҕа көрдөрдүлэр.
Далбардар минньигэс астарын аукциоҥҥа туруордулар. Аукционтан киирбит үп-харчы байыаннай дьайыы кыттыылаахтарыгар көмөҕө бэриллиэҕэ. Аукцион сыаната 3 тыһыынчаттан саҕаланан, 124 тыһыынчаҕа тиийдэ. Чуолаан, бу сыанаҕа Намтан кыттааччы Ольга Сивцева сахалыы аһылыгын кэмпилиэгин ыллылар. Асчыттар бэйэлэрин хаһаайыстыбаларыттан, күөх боллохтон ылбыт сахалыы астарын кэмпилиэгэ бары ураты тиэмэлээхтэр, бэйэлэрин улуустарын, төрөөбүт алаастарын кэрэтин көрдөрөллөр. Истиҥ ийэлэр дууһаларын, сүрэхтэрин сылааһын ууран туран бэлэмнээбит астара хамаҕатык атыыга барда.
Дьүүллүүр сүбэ үлэлиир кэмигэр бу күн «Далбар Хотун» сурунаалга суруйтарбыт ааҕааччыларга лотерея оонньонон, спонсордартан бэлэхтэри туттулар.
Муҥутуур бирииһи (супер бирииһи) — «Кэрэ» маҕаһыынтан 50 тыһыынча суумалаах сэртипикээти Мэҥэ Хаҥалас Табаҕатын олохтооҕо Күннэй Татаринова ылла.
Күрэххэ кыайыылаахтар маннык номинациянан быһаарылыннылар.
Дьүүллүүр сүбэ бэрэссэдээтэлэ Наталья Харлампьева Арассыыйа Суруйааччыларын сойууһун аатыттан анал бирииһи ийэҕэ аналлаах ырыаны ыллаан үгүс киһини долгуппутун иһин Анастасия Шеломоваҕа туттарда
«Талба Хотун» — Екатерина Спиридонова (Үөһээ Бүлүү улууһа);
«Ийэ Хотун» — Саина Григорьева (Уус Алдан);
«Уран Хотун»— Евдокия Петрова (Мэҥэ Хаҥалас);
«Байылыат Хотун» — Ольга Сивцева (Нам);
«Айыы Хотун» — Прасковья Петрова (Таатта);
«Сайдам Хотун» — Анастасия Шеломова (Чурапчы);
«Хоһуун Хотун» — Светлана Васильева (Хаҥалас);
«Биһирэм Хотун» (норуот куоластааһынынан) — Анастасия Шеломова (Чурапчы).
«Далбар Хотун-2026» үрдүк ааты 13 оҕолоох Саина Григорьева (Уус Алдан улууһа) ылла!