Аан дойду дьахталларын күнүн иннинэ хорсун сүрэхтээх, амарах дууһалаах «Ведьма» диэн аатынан биллэр Варвара Одинцованы кытта көрсөн кэпсэттибит. Кини бойобуой сырыыларын, байыаннай дьайыыга хайдах кыттыбытын уонна сулууспатын ураты түгэннэрин туһунан кэпсээтэ. Варвара Одинцова устуоруйата – хорсун, аһыныгас, дьыалаҕа бэриниилээх буолуу холобура. Биһиги ортобутугар дьоруойдар олороллорун, дойдубут туһугар бэриниилээх кэрэ аҥаардар баалларын туоһулуур.
Эрдэтээҥҥи олох
— Бэйэҥ тускунан кылгастык кэпсээ эрэ. Байыаннай дьайыы иннинэ тугунан дьарыктаммыккыный?
— Мин Эдьигээн оройуонун кыракый Эдьигээн бөһүөлэгэр төрөөбүтүм. Оҕо сааһым онно ааспыта, оскуоланы бүтэрэн, тиэхиньиичэскэй училищеҕа социальнай үлэһит идэтигэр үөрэммитим. Олох араас тургутуутун ааспытым: кэргэн тахсыы, арахсыы, уустук сыһыан, эр киһи атаҕастабыла, илиитин көтөҕүүтэ барыта баар этэ. Арахсан баран, санаа-оноо түһүүтэ, кыаҕа-күүһэ суох буолуу, бэйэҕэ эрэли сүтэрии ыар баттыгар ылларбытым, ол куһаҕан түмүккэ тиэрдибитэ — буруйга-сэмэҕэ тардыллан, көҥүлүм быһылла сылдьыбыта. Ол эрээри, иэдээн үөйбэтэх өттүбүттэн кэлбитин эппинэн-хааммынан билэн, тахсан баран дьылҕабын уларытар баҕа санаам баһыйбыта. Сотору кэминэн иккистээн кэргэн тахсыбытым, икки оҕону төрөппүтүм уонна бэйэбин дьиэ кэргэни көрүүгэ-истиигэ аныырга быһаарыммытым. Төһө даҕаны үчүгэйдик олорон истэрбин, оҕолорум, тулалыыр дьонум харахтарыгар ытыктабылы ылар санааттан толкуйга түспүтүм. Ийэбин, кэргэммин, улахан оҕолорбун кытары сүбэлэһэн баран, байыаннай дьайыыга барарга бигэ санааны ылыммытым.
Байыаннай дьайыыга барыы
— Барарга быһаарыныыгар туох төрүөт буолбутай?
— Дьиҥинэн, босхолонон бараммын, оҕолорбор, уопсастыбаҕа дьоһуннаах киһи буоларбын көрдөрүөхпүн баҕарбытым. Барыам иннинэ ийэбин кытта ирэ-хоро кэпсэппитим, дьиэ кэргэним уонна доҕотторум өйөөбүттэрэ. Кырдьыгын эттэххэ, миэхэ ааспыт олоҕум хара бээтинэтин суох оҥорорго, ааппын ыраастыырга уонна иэһим-күүһүм мунньуллан, ону төлөһөргө уонна итиэннэ ааспыт сыыһаларым буруйун ыраастыырга кыах көһүннэ дии санаабытым. Бастаан, дьиҥэ, миэдиктэр батальоннарыгар ыытыахтара диэн эрэллээх этим, инники кирбииттэн, сэрии буола турар сириттэн арыый ыраах хаалар баҕалааҕым. Ол эрээри дьылҕам инники кирбиигэ, уот айаҕар тиэрдибитэ.
Салгыытын «Саха сирэ» хаһыат бүтэһик нүөмэригэр ааҕыҥ.