С/2026 A1 комета дьылҕатын суолуттан туораабакка, Күн диэки ыппыт охтуу көтөн иһэр. Күҥҥэ чугаһаан, сыралҕан уокка умайан, паар буолан көтөрө 18 хонук хаалла. Учуонайдар этэллэринэн, комета муус устар 18 күнүгэр киэһэ 5 чааска (Москва бириэмэтинэн) Күҥҥэ тиийэн түһүөхтээх.
Күҥҥэ чугаһаабыт эттиктэр ити курдук умайан, симэлийэн иһэллэр. 21-с үйэҕэ Күҥҥэ чугаһаабыт биир эрэ комета мүлчү көппүттээх эбит. Бэйэтин маассатыттан 90 %-нын уонна кутуругун сүтэрэн бытарыйан баран, C/2011 W3 комета кыл-мүлчү куота көтөн, куйаарга кутуруга куйаара турбута. Оттон 2024 сыл алтынньы 28 күнүгэр биир саамай чаҕылхай C/2024 S1 комета Күҥҥэ 2 мөлүйүөн килэмиэтир чугаһаан баран, уу хааппылатын курдук ууллан, сүппүтэ.
Онон учуонайдар бу саҥа комета мүлчү көтөрүн дуу, эмиэ ууллан сүтэрин дуу туһунан мөккүһэллэр. Үгүстэрэ симэлийиэ диэн этэллэр.
Кулун тутар бүтэһик күннэригэр комета Күҥҥэ номнуо чугаһаан, итийэн, араас бэссэстибэлэри таһаарара элбиэҕэ. Онон, муус устар ый саҥатыгар, Күҥҥэ баран түһүө 2-3 хонук иннинэ, кутуруга улаатан, уһаан, чаҕылыйан ылыаҕа. Күн киирбитин кэннэ, арҕааҥҥы саҕахха уу хараҕынан көрүөххэ сөп буолуоҕа диэн астрономнар этэллэр.
Билигин комета сырдыга улаатан иһэр, ол кээмэйинэн куйаарга сылдьар 100 кометаттан иккис миэстэҕэ таҕыста. Биир нэдиэлэнэн, бастакы миэстэҕэ тахсыахтаах.