Бу күннэргэ Мэҥэ Хаҥаласка Нөөрүктээйи нэһилиэгэр үтүөлээх каадырабай булчут, балыксыт Ньургун Петрович Ефремов кэриэһигэр анаммыт улуустааҕы «Байанай — 2026» күрэх буолан ааста.
Барыта 7 хамаанда кыттан сатабылларын көрдөрөн, бэрт сэргэх, тыҥааһыннаах киирсии буолла.
Улуус баһылыгын нэһилиэнньэ олоҕун-дьаһаҕын хааччыйыыга солбуйааччы, Саха төрүт дьарыгын федерациятын бэрэссэдээтэлэ Николай Никифоров, улуус дьокутааттарын Сэбиэтин бэрэссэдээтэлэ Иннокентий Андросов уонна «Парус» спорт уораҕайын салайааччыта Дьулустаан Захаров кыттааччыларга түмсүүлээх, бэлэмнээх хамаанда кыайыыны ситиһэригэр баҕа санааларын эттилэр, эҕэрдэ тылларын анаатылар.
Дьүүллүүр сүбэ тыҥааһыннаах киирсии кэнниттэн түмүгү таһаарда, манна улуус баһылыгын бастакы солбуйааччы Гаврил Толстяков муҥутуур кыайыылаахтары эҕэрдэлээтэ.
Бастакы миэстэ Моорук нэһилиэгин хамаандата буолла. Кинилэр үрдүк бэлэмнэрин, бастыҥ сатабылларын көрдөрдүлэр.
Иккис миэстэҕэ Майа сэлиэнньэтин хамаандата таҕыста.
Үһүс миэстэни эмиэ дьоһуннаах бэлэмнээх Мөҥүрүөн хамаандата ылла.
Эрэллээхтик кыайбыт уолаттарбытыгар, бары кыттааччыларга уонна бу күрэҕи үрдүк таһымҥа тэрийбит тэрийээччилэргэ барҕа махтал буолуохтун!
Мэҥэ Хаҥалас улууһун дьаһалтатын пресс-сулууспата