Кулун тутар 25–28 күннэригэр Мииринэй куоракка АЛРОСА хампаанньа өйөбүлүнэн 19–22 саастаах юниордарга буоксаҕа Уһук Илиннээҕи федеральнай уокурук первенствота буолуоҕа. Күрэхтэһии РСФСР уонна САССР үтүөлээх тириэньэрэ Радий Бугашеев сырдык аатыгар уонна Саха сиригэр буокса сайдыытын 70 сылыгар ананар.
Бу туһунан АЛРОСА пресс-сулууспата иһитиннэрэр. Уһук Илин саамай күүстээх боксердарын киирсиилэрин «Алмазный край» медиа-хампаанньа быһа биэриитигэр көрүөххэ сөп.
Күрэхтэһиигэ Саха сириттэн, Читаттан, Бурятияттан, Сахалинтан, Магадантан уонна Приморскай кыраайтан 70-тан тахса күрэсчит кыттарын бигэргэттэ. Күрэхтэһии кулун тутар 25 күнүгэр олимпийскай чөмпүйүөн Евгений Тищенко маастар-кылааһыттан саҕаланыаҕа.
Мииринэй куорат ыалдьааччыларын күрэхтэһиини «Кимберлит» успуорт комплексыгар кэлэн көрөллөрүн ыҥыраллар. Оттон атын куораттар буоксаны сэргээччилэрэ киирсиилэри «Алмазный край» телеханаал быһа биэриитигэр: «Ростелеком» IPTV 22-с ханаалыгар, «Алмазный край» мобильнай сыһыарыытыгар (приложениетыгар) уонна almaz-media.tv саайтка кэтээн көрүөхтэрин сөп.
Күрэхтэһии бырагыраамата:
- Кулун тутар 25 күнэ, 15:00 чаастан — аһыллыы сиэрэ-туома, эрдэтээҥҥи киирсиилэр;
- Кулун тутар 26 күнэ, 15:00 чаастан — эрдэтээҥҥи киирсиилэр;
- Кулун тутар 27 күнэ, 15:00 чаастан — полуфинал киирсиилэрэ;
- Кулун тутар 28 күнэ, 17:00 чаастан — финал киирсиилэрэ.