Муус устар 4 күнүгэр Гавриил Чиряев төрөөбүтэ 101 сыла туолла. Бу бэлиэ күҥҥэ Дьокуускайга кини аатын сүгэр искибиэргэ судаарыстыбаннай уонна бэлитиичэскэй диэйэтэл бүүһүгэр сибэкки дьөрбөтүн уурдулар.
Тэрээһиҥҥэ Саха сирин бырабыыталыстыбатын чилиэннэрэ, Ил Түмэн дьокутааттара, куорат дьаһалтатын бэрэстэбиитэллэрэ, уопсастыбанньыктар уонна көхтөөх дьон кытыннылар.
«Гавриил Иосифович Саха сирэ бырамыысыланнай эрэгийиэн быһыытынан сайдарыгар олук уурбут эйгэни тэрийбитэ. Үөрэҕирии тиһигэр улахан уларыйыылар тахсыбыттара. Ол сылларга физика-математика хайысхалаах кылаастар арыллан барбыттара, наука эйгэтигэр тиэхиньикэ уонна бырамыысыланнас хайысхатыгар чинчийиилэр ыытыллаллара. Кини уһулуччулаах үлэтин-хамнаһын өссө да элбэх сыллар устата үөрэтиэххэ наада», — диэн Саха сирин үөрэҕин уонна наукатын миниистирин бастакы солбуйааччыта Ньургун Павлов туһаайан эттэ.
Сибэкки ууруутун үөрүүлээх тэрээһинигэр Гавриил Иосифович кыыһа — Наталья Чиряева баар буолла.
«Дьон кинини өйдүүрэ уонна сэҥээрэрэ — олус улахан суолталаах. Мин аҕабын кытта бииргэ үлэлээбит дьон ахтыыларын олус интэриэһиргээн ааҕабын. Ону ааҕан, кини дьоһуннук үлэлиир уонна бары сорудахтары толорор дьону таба талан ылар ураты дьоҕурдаах эбит диэн өйдүүбүн», — диэтэ кини.