Бу күннэргэ Саха сирин муниципальнай тэриллиилэрин сэбиэтин — муниципалитеттар икки ардыларынааҕы бииргэ үлэлээһин ассоциациятын X сийиэһэ буола турар. Мэҥэ Хаҥалас улууһун Моорук нэһилиэгин баһылыга Радомир Никитин сийиэскэ кыттыытын туһунан санаатын үллэһиннэ:
— Бу күннэргэ нэһилиэк, улуус баһылыктарын кыттыылаах муниципальнай тэриллиилэр онус уочараттаах сийиэстэрэ буола турар. Бүгүн сийиэс үһүс күнэ. Ол курдук, бүгүн Бырабыыталыстыба чааһыгар бары улуустар кыһалҕалаах боппуруостарын туруорустулар. Мунньаҕы СӨ Бырабыыталыстыбатын Бэрэссэдээтэлин солбуйааччы Ольга Балабкина салайан ыытта. Мунньах нэһилиэк, улуус баһылыктара бэйэлэрин кыһалҕалаах боппуруостарыгар тута хоруйу ылалларыгар көдьүүстээх былаһаакканан буолла. Министиэристибэлэр, биэдэмистибэлэр исписэлиистэрэ кэлэн быһааран биэрдилэр.
Маннык тэрээһин ыытылла тураллара олус үчүгэй, туһалаах. Тоҕо диэтэххэ, биһиги, нэһилиэк баһылыктара бэйэбит санаабытын этэн, сөптөөх хоруйу ылан, дьоммутугар-сэргэбитигэр тиэрдэрбитигэр сөптөөх. Манна үрдүкү салалтаны кытары билсэн, салгыы атах тэпсэн олорон киирэн кэпсэтэргэ олук ууруллар дии саныыбын. Онон, чуолаан биһиэхэ олус туһалаах тэрээһин буолла.