Баһаары утары «Уоту тохтот!» федеральнай информационнай хампаанньа Арассыыйаҕа быйыл кулун тутар 15 күнүттэн балаҕан ыйын 30 күнүгэр диэри ыытыллар. Бу хампаанньа киһи буруйунан айылҕаҕа баһаар тахсар кутталын аччатыыга уонна кураанах оту көҥүлэ суох уматыыны сэрэтиигэ туһаайыллар.
«Статистика көрдөрөрүнэн, ойуур баһаарын 70 кэриҥэ бырыһыана киһи буруйунан тахсар. Саас уонна күһүн баһаар тахсар саамай биллэр төрүөтүнэн тыа хаһаайыстыбатын сирдэригэр, даача учаастактарыгар уонна атын да сирдэргэ кураанах оту хонтуруола суох уматыы буолар», – диэн тэрээһини тэрийээччилэр бэлиэтээтилэр.
«Уоту тохтот!» хампаанньа сүрүн сыала – ойуурдарга уонна онно сыһыаннаах территорияларга баһаар куттала суох буолуутун быраабылаларын кэһиини сэрэтии, ону тэҥэ ойуур пуондатын харыстааһын буолар. Сыл аайы айылҕа баһаардарын биир сүрүн төрүөтүнэн буолар кураанах оту-маһы уматыыны тохтотууга ураты болҕомто ууруллар.
Хампаанньа чэрчитинэн нэһилиэнньэни кытта иһитиннэрэр-быһаарар үлэ күүһүрдүлүннэ. Гражданнарга баһаар куттала суох буолуутун быраабылаларын тутуһар наадалааҕын санаталлар, сокуону кэһии иһин эппиэтинэһи быһаараллар, ону тэҥэ кураанах оту көҥүлэ суох уматыы уонна көрүүтэ-истиитэ суох хаалбыт кутаа уот содулун туһунан кэпсииллэр.
Санатан эттэххэ, бу иннинэ СӨ Ил Дархана Айсен Николаев Ил Түмэҥҥэ туһаайан этиитигэр, дойду Бэрэсидьиэнэ Владимир Путин өйөбүлүнэн уонна экология куттала суох буолуутугар күүстээх болҕомто ууруллубутун түмүгэр, 2025 сылга өрөспүүбүлүкэ ойуурдарыгар ыксаллаах быһыы-майгы эрэсиимэ киллэриллэрин толору мүлчү көтөр кыахтаммытын бэлиэтээбитэ. Оойуур баһаарын уопсай иэнэ 160 тыһыынча гектарга диэри аччаабыта, бу ааспыт сыллар көрдөрүүлэриттэн уонунан төгүл кыра.
Сиһилии: https://www.sakha.gov.ru/news/45269