Оҕолор эксээмэҥҥэ хаттаан бэлэмнэнэ таарыйа идэҕэ үөрэниэхтэрэ. Бу быраабынан быйыл судаарыстыбаннай түмүктүүр аттестацияны кыайан ааспатах үөрэнээччилэр туһаныахтара диэн РФ Үөрэҕириитин министиэристибэтин МАХ ханаалыгар иһитиннэрэллэр.
“Дойду Бэрэсидьиэнэ “Үөрэх туһунан” сокуоҥҥа уларытыылары киллэриини бигэргэтиитэ, быйыл 9-с кылаас эксээмэнин кыайан туттарбатах оҕолор бириэмэлэрин сүтэрбэттэрин туһугар номнуо быйылгыттан үлэлиэҕэ. Кинилэр үөрэх хаамыытыттан хаалбакка эксээмэни хаттаан туттарыыга бэлэмнэллэрин таһынан, бэйэлэрин эрэгийиэннэригэр ирдэнэр идэлэри баһылыахтара. Бу кинилэр оҥорон таһаарар салааҕа сатабылы ылалларыгар көмөлөһүөҕэ. Ол аата үлэҕэ киирэллэригэр мэктиэлиэҕэ, оттон эксээмэннэрин туттарбыттарын кэннэ – салгыы сайдалларыгар. Кэлиҥҥи сылларга оробуочай идэ аата-суола, үлэ ырыынагар ирдэниитэ улаатан иһэрин бэлиэтиир оруннаах” – диэн РФ үөрэҕириитин миниистирэ Сергей Кравцов эттэ.
Бу оҕолорго аналлаах идэ испииһэгин эрэгийиэн каадырга ирдэбилигэр олоҕуран дойду субъектара бэйэлэрэ быһаараллар. Кинилэри үөрэх тэрилтэлэрин баазаларыгар уонна тэрилтэлэр үөрэтэр кииннэригэр бэлэмниэхтэрэ. Тэрилтэлэр испииһэктэрин былаас эрэгийиэннээҕи уорганнара быһаарыахтара. Оҕо идэҕэ үөрэтии кууруһун кэмигэр салгыы сүрүн уопсай үөрэхтээһин бырагырааматын барыаҕа.