Муус устар 27-29 күннэригэр Иркутскай куоракка 2017–2018 сыллааҕы төрүөх оҕолорго Улуу Кыайыы кубогар аналлаах хоккей күрэхтэһиитигэр аһаҕас турнир буолан ааста.
Бурятияттан, Иркутскайтан уонна Саха сириттэн барыта 6 хамаанда күрэхтэстэ. Түмүккэ икки хамаанда — «Олимпия» (Иркутскай) уонна «Полярные волки» (Дьокуускай) бастаатылар.
— Саха сириттэн 14 оҕо кыттан, кыайыы өрөгөйүн билэн, үөрэн-көтөн кэллэ. Турнир финалын кэмигэр биһиги оҕолорбут бэлэмнэрин, кыайыыга дьулуурдарын уонна биир сомоҕо хамаанданан оонньууларын көрдөрдүлэр. Быһаарыылаах киирсиигэ кинилэр утарсааччыларын эрэллээхтик кыайан, кытаанах санааларын уонна маастарыстыбаларын көрдөрдүлэр. Маныаха эдэр тириэньэр Никита Дружинин “буочарын” – оҕолорбутун кыайыыга сирдээбит кылаатын бэлиэтиибит. Кини салалтатынан оҕолор бэйэлэрин кыахтарын арыйан, үрдүк ситиһиигэ тиийдилэр. Уһук Илин эрэгийиэнигэр “Улуу Кыайыы кубога” — Саха сиригэр оҕо хоккейын сайыннарыыга улахан хардыы. Никита Дружинин идэтигэр олус бэриниилээх тириэньэр. Араас омук оҕото түмсэн оонньуур «Полярные волки» хамаандаҕа чаҕылхай ситиһиилэринэн тохтообокко, салгыы саҥа чыпчаалларга эрэллээхтик дабайан иһэллэригэр баҕарабыт, — диэн кыайыылаах хамаанда төрөппүттэрин уонна чугас аймахтарын аатыттан тириэньэр Никита Дружиниҥҥа бэйэтин алгыһын тиэртэ СӨ үөрэҕириитин туйгуна Ангелина Говорова.
Арассыыйаҕа Норуоттар сомоҕолоһууларын сылыгар Улуу Кыайыы күнүн көрсө “Полярные волки” хамаанда СӨ Хоккейга Федерациятыгар умнуллубат бэлэҕи уунна. Саха сирин дорҕоонноохтук ааттаппыт оҕолор Ийэ дойдуга бэриниилээх буоларга бу маннык улахан тэрээһиннэргэ кыттан, өссө онно кыайан, буһан-хатан тахсар буоллахтара.