Өйдүүгүт дуо, саамай биллэр-көстөр эдэр ыччат хаһыатын – «Эдэр сааһы»? Бары бииргэ 90‑с сыллар саҕаланыыларыгар төннүөҕүҥ, бу кэмҥэ хаһыат Саха сирин эдэр ыччатыгар дьиҥнээх сирдьитинэн буолбута.
33 сыл анараа өттүгэр, 1993 сыллаахха, суруналыыс Иван Ушницкай өрөспүүбүлүкэҕэ эдэр ыччат бэчээтин өйдөбүлүн уларыппыт таһаарыыны төрүттээбитэ. Санаа соһуччу кэлбитэ: кини эдэр дьон истиэнэлэригэр Арассыыйа эстрадатын сулустарын постердарын ыйаабыттарын бэлиэтии көрбүтэ. Оччолорго Иван толкуйдаабыта: тоҕо кинилэргэ бэйэбит сулустарбытын – талааннаах уолаттары-кыргыттары кэпсээбэт буолуохтаахпытый? Итинник өрөспүүбүлүкэ бастакы эдэр ыччат хаһыатын идиэйэтэ төрөөбүтэ. Бу туһунан СӨ Ыччат министиэристибэтэ суруйар.
Социальнай ситимнэрэ суох, ол эрээри ис сүрэхтэн
Ити сылларга социальнай ситим да, мессенджер да суоҕа. «Эдэр саас» эдэр дьон сибээстэһэр сүрүн ханаалынан уонна сонуннар источниктарынан буолбута. Хаһыат көмөтүнэн аттыгар олорор талааннаах биир саастыылаахтарын, үрдүк уонна орто үөрэх кыһаларыгар буолар тэрээһиннэри, кэнсиэртэри, бэстибээллэри уонна бэйэни көрдөрөр кыахтар тустарынан билэллэрэ.
Саҥа нүөмэри бары тулуйбакка-тэһийбэккэ күүтэллэрэ, илииттэн илиигэ биэрэн ааҕаллара, сөбүлүү көрбүт хаартыскаларын, кумирдарын постердарын таһыгар кырыйан ылан истиэнэлэригэр ыйыыллара.
Редакция хайдах үлэлээбитэй?
«Эдэр саас» кэрэспэдьиэннэрэ офис иһигэр олорбот этилэр – кинилэр эдэр дьон олоҕо оргуйар сиригэр сылдьаллара: устудьуоннар уопсайдарын кэрийэллэрэ, лиидэр ыччаттартан интервью ылаллара, кэнсиэртэргэ, бэстибээллэргэ, успуорт күрэхтэһиилэригэр сылдьаллара, пленкалаах фотоаппаратынан фоторепортаж оҥороллоро, интэриэһинэй историялары көрдүүллэрэ.
Сөбүлүүр рубрикалар – эпоха сүрэҕэ
«Хараҥа хос», «Сүрэх кистэлэҥэ», «Сулустуун кэпсэтии», «Суорҕан анныгар», билсиһии рубриката ааҕааччылар сүрэхтэригэр ураты миэстэлэммиттэрэ. Манна кэрэспэдьиэннэр остолобуойдарга уонна тэрилтэлэргэ сылдьан, соҕотох эдэр дьону булан, көрсүһүннэрэн биэрэннэр, кинилэр дьылҕаларын холбууллара. Бу онлайн-сервистэр иннилэринэ дьиҥнээх билсиһии сулууспата этэ.
Рекордтар уонна триумфтар
Хаһыат ситиһиититтэн бары да соһуйбуттара. Тираж 52 тыһыынча экземплярынан – Саха сиригэр билигин да куоһарылла илик рекорд – тиийбитин таһынан, 100‑с нүөмөрүгэр эрэдээксийэ «50 лет Победы» комплекска улахан шоу тэрийбитэ. Саалаҕа «лыык» курдук киһи этэ, «дьаабылыка түһэр да сирэ суоҕа», ону таһынан хаһыат элбэх эдэр ааптарга суруналыыстыка бастакы оскуолатынан буолбута.
«Эдэр саас» хаһыат – бу аҥардас хаһыат эрэ буолбатах, бу бүтүн көлүөнэ эдэр сааһын хрониката этэ. Кини эдэр дьон аһаҕас буолалларыгар, бэйэлэригэр итэҕэйэллэригэр уонна төрүттэринэн киэн тутталларыгар үөрэтэрэ.
Билигин хаһыат онлайн-формакка көстө. «Эдэр Саас» саайтыгар киирэн, хаачыстыбалаах матырыйааллары ааҕыҥ уонна бэйэҕит историяларгытын үллэстиҥ.
Оттон эһиги өйдүүгүт дуо, «Эдэр саас» нүөмэрдэрин? Баҕар, дьиэҕитигэр ханнык эмэ нүөмэр хаалбыта буолаарай?
«Эдэр саас, тук‑тук‑тук» – 90‑с сыллар эдэр ыччаттарын сүрэхтэрин тэтимин курдук, бүгүн да иһиллэр.