Тамара Лазаревна Данилкина аатынан Өлөөннөөҕү Оҕо искусствотын оскуолатын Харыйалаах үөрэнээччилэрин Ырыа күнүгэр анаан “Ырыа ыллыгынан” диэн ааттаах отчуоттуур кэнсиэртэрэ буолла.
Оҕолор өссө биир сыл ырыа алыптаах, кэрэ эйгэҕэ үөрэммиттэрин көрөөччүлэр, төрөппүттэрин, бииргэ үөрэнэр доҕотторун иннилэригэр көрдөрдүлэр. Оҕолор сценаҕа тахсан туттарга-хаптарга, көрөөччүгэ ырыа ис хоһоонун тиэрдэр үөрэҕи ааһаллар, ол улаатан личность быһыытынан сайдалларыгар олук буолар. Кыргыттар мап-мааны маҥан лыахчаан курдуктар. Бэйэлэрэ да килбиктэрин, нарыннарын, кинилэри ама, ким сибэккигэ тэҥнии көрүө суоҕай? Уолаттар уол-уол курдук сүүрэн-көтөн элэстэнэн, сценаҕа тахсан син оннуларын булаллар. Ып-ыраас санаалаах оҕолор, аныгы кэм оҕолоро буолан фонограмманан ыллыыллар.
Дьиҥинэн, ансаамбылынан ыллыыр сүрдээх уустук жанр буолар, куолас, тембр, тональность, урут-хойут түсүһүү барыта манна чочуллар. Фонограмма баян буолбатах, эмиэ атын, хааллыҥ эбэтэр куоттуҥ даҕаны, ырыа сатаммат. Оҕолору бу дьикти алыптаах эйгэҕэ үөрэтэр, дьарыктыыр муусука учуутала Екатерина Кайдалова. Оҕолорун кытта биир ситимҥэ киирэн күн аайы дьарыктанан үлэ түмүгүн таһаардылар. Сааскы сылаас күннэргэ оҕо — аймах таһырдьаттан киирбэт, ону ол диэбэккэ, этиллибит бириэмэҕэ култуура киинигэр киирэн кэлэ тураллар. Оҕолор сөбүлүүр дьарыктаах буолан эппиэтинэскэ да үөрэнэллэр. Маны таһынан Екатерина Григорьевна “Северянка” ансаамбылы тэрийэн үһүс сылын ырыаҕа үөрэтэр. Бу эмиэ туспа кэлэктиип быһыытынан баар буоларыгар, байыаннай дьайыыга саллаат уолаттарга анаан таҥас тигиитигэр иистэммит дьахталлары кытта сүбэлэһэн тэриллибитэ. Түгэнинэн туһанан, оҕолорбутугар, “Северянка” ансаамбыл кэрэ куоларыгар, ырыа күнүгэр көрөөччүлэргэ иэйэр кут киэһэтин бэлэхтээбиттэригэр махтанабыт! Галина Владимировна Николаева аатынан “Илкээнньи” Култуура киинин үлэһиттэрэ атыы-дьаарбаҥка аһымал аахсыйатын тэрийэн, киирбит үбү ыарыһах эмтэнэригэр диэн “Сигундер” пуондаҕа туттардылар.
Надежда Колодезникова,
Өлөөн.
Хаартыска: ааптар тиксэриитэ